自導不演《美人魚》 周星馳：愛情總有遺憾
發布時間： 2016/01/21 15:43
最後更新： 2020/04/24 12:26
▲ 周星馳在新作《美人魚》繼續只導不演。 （經濟日報圖片）
你知唔知星爺係邊位？知！
係囉，試問邊個唔識周星馳？對佢作品嘅敬佩之情更猶如黃河之水滔滔不絕。他為導演作《美人魚》與演員羅志祥一起受訪，但畀你估到就唔係星爺啦，低調但受萬民景仰嘅周星馳一時認真、一時講笑，邊句真邊句假就要你估，但從字裏行間，還是可略窺高傲但宅心仁厚嘅星爺之內心一二。
記者：星爺近年作品由《長江 7 號》、《西遊‧降魔篇》到《美人魚》都是涉及大量特技的超現實題材，你在構思劇本時是先有 CG 畫面的想像還是先有故事？
周星馳：係故事先，因為我比較鍾意啲所謂超現實嘅嘢。
記者：但為何拍《美人魚》？
周星馳：
我細細個就鍾意美人魚㗎喇，有諗過呢個世界有冇美人魚㗎呢？因睇過有啲報道話生物進化過程中，有出現過半人半魚呢個咁嘅分支，當然呢個係較天馬行空嘅諗法，但我覺得好有趣。
其實我情願相信真係有外星人等所謂謎團嘅生物存在，美人魚就係其一，而且佢係家喻戶曉嘅題材，但被拍電影就較少，當然可能係技術嘅難度，因為一講到美人魚就牽涉好多水裏面嘅嘢，不過對我嚟講就好新鮮，覺得值得去做。
記者：呢啲超現實題材嘅角色都係不被常人理解、心靈受傷害、感到寂寞，有冇自況成份？
周星馳：嗯……咁又冇。美人魚同我冇咩直接投射……表面上冇，等我諗深一層睇吓有冇先，返屋企再諗，潛意識如果有，就再話你知。（笑）
記者：那麼片中你將「自己」放得最多在哪個角色上？這在創作時應會考量過。
周星馳：每個角色都有自己投射，因所有角色都同等重要，包括八爪魚（羅志祥飾）、林允（女主角）。
記者：在內地的宣傳用「無敵」為口號，為甚麼？是指「無敵最寂寞」？是講自己嗎？
周星馳：因為戲中有個角色覺得自己無敵，佢仲常常唱一首飲歌叫《無敵》嚟歌頌自己，但就唔係形容我，係電影角色嚟嘅。
小豬演八爪魚冇褲着
記者：為何繼《西遊‧降魔篇》再起用小豬（羅志祥）？
羅志祥：我強迫他，我說「拜託找我」。
周星馳：我就唔想，他說「唔該你吖」咁樣，原本八爪魚個角色諗住我嚟㗎嘛。
記者：真定假呀？
周星馳：有諗過。
記者：為何最後邀請小豬？
周星馳：八爪魚呢個角色行路永遠都係倒吊，喺天花板、牆上爬吓爬吓，而且喺成齣戲未着過褲。所以個角色好大挑戰性，覺得終於搵到個角色畀自己喇，仲唔係我做？都畀佢搶埋，所以呢個世界真係好艱難。
記者：小豬你搶了星爺的角色，那麼拍攝時他有沒有整你？
羅志祥：沒有。
周星馳：他確實做得比我好。角色沒褲子穿，佢真係唔着就唔着㗎喇……
羅志祥：有一個畫面有穿。
周星馳：佢穿了幾秒鐘，有一個畫面講他非要穿褲子不可。
羅志祥： 因為（角色）8 隻爪，想知道穿褲子的感覺。最後穿了，但有幾隻腳走出來，去看（電影）便知道。
將想法灌注不同角色
記者：今次本來有八爪魚角色結果冇演，但事實星爺現在只導不演，大家在網上都發表很多意見，你有冇睇過？對公眾的渴求有何回應？
周星馳：我約略都知道。一日都係你啦（笑着指羅志祥），你話，點交代吖？
羅志祥：等下一次。
周星馳：總有機會嘅。但話分兩頭，現時注意力都放喺拍攝上，對於演出，都唔係唔想，不過唔係我嘅目標，如果成部電影我可以做到自己心入面嘅效果，就係依家嘅目標。雖然冇演出，但係我將本身好多諗法，都擺喺唔同演員身上，覺得通過佢哋去表現我嘅種種諗法，比我去演更加好，係真㗎。
記者：星爺作品內的愛情都是有遺憾，今次人同魚之間會係點？你想呈現一個點嘅愛情觀？
周星馳：
愛情都係咁㗎啦，都係有啲遺憾。（認真地說）
記者：但你以前作品是大喜，近年作品卻是大悲。
周星馳：
愛情嘅神髓，唔係就喺個「悲」字咩？
應該係啦，佢（指小豬）get 到晒，你都經歷過唔少生生死死嘅苦戀啦，所以完全理解。
悲係愛情嘅重點，吸引力亦正係呢個。
羅志祥：是嗎？
周星馳：嗱，睇佢（指着筆者），見你頭先點點頭，所以呢啲真係專家，專家一聽就明㗎喇。
記者：我只不過係一條溝唔到女嘅可憐蟲啫。（出自《行運一條龍》對白）
周星馳：咁呢個都係一個悲，得到之後又有另一樣悲。
記者：提到大悲的問題，因你近年作品內的愛情都係講犧牲，比如大愛與小愛不可並存，為何創作方向有此改變？
周星馳：咁樣樣都試吓嘅。
記者：關唔關年紀同心境事？
周星馳：可能關事，但我就冇研究，而且都係根據唔同嘅題材去處理，好似《美人魚》當然有愛情又有恩怨情仇，但今次最後係個開心嘅結局，所以都係睇故事發展，以及唔同題材內，觀眾會想點樣而決定。（《美人魚》上映日期：2 月 8 日）
《美人魚》女主角林允：星爺很有耐性教我
星爺素來獨具慧眼，張柏芝、黃聖依及張雨綺後，今次相中外表似徐熙媛（大 S）及舒淇混合體的林允。之前從無演戲經驗的她，去年參加選拔而雀屏中選，參演《美人魚》時只得 18 歲。
不過能成為星女郎不容易，演出時需要長時間浸在水中，因在水裏太久，她說拍完此片至今都再沒興致游泳：「拍時待在水裏 1 天，如果未到你的戲可以上去，但是不想上，因為再下水的感覺刺骨，特別冷，加上不是流動水，不太乾淨。另外，吊威也時，有次頭撞過去，感覺腦袋被人踢了一腳。」
她說至今也沒問過星爺選她的原因：
第一次見到他是決賽時，看到偶像，很緊張，他蠻嚴肅，進組後，更嚴肅，工作嘛，有時候我會怕，怕做不到要求。不過他對我很客氣的啦，他要求高，對我很有耐性去教。
她覺得演出最難掌握是感情戲：「這對新人來說較難，18 歲也沒多深刻的感情，但演的可是生死離別。」
後記
訪問星爺，事前頗怕他受訪時全程遊花園。但星爺就係估佢唔到，他一到來便笑容滿面有禮地打招呼，訪問時，盡展幽默令全場爆笑。而且很多平時遇慣明星的記者行家，訪問完都禁不住要集星爺郵，放上 facebook 放閃光彈呃 like，可見星爺魅力確係勁。
當然，他對有關電影製作的問題頗樂意回答，但對個人問題則始終耍太極，但有時也流露一點真情，筆者印象最深是他有所感地答「愛情嘅神髓，唔係就喺個『悲』字咩」，似有千言萬語，但箇中真意相信要從其作品發掘。
「情」素為其作品重點，《美人魚》男主角鄧超片中唱《無敵》「獨自在頂峰中……我的寂寞，誰能明白我」；而宣傳歌用《世間始終你好》，詞中「真愛有如天高」，是否當吃過為你滴淚的人所弄的黯然銷魂飯、甜在心饅頭、波板糖，一旦失去了，方知「世間始終你好」？苦海翻起愛恨，今次星爺又將如何詮釋愛情？
全文刊於《經濟日報》（收費閱讀）
