海洋公園加薪最多6%　利市縮水3成

海洋公園雖然去年全年入場人數按年跌14%，但管理層並沒有因而決定凍薪，整體員工按表現加薪2%至6%、並獲介乎半個至1個月月薪的花紅。員方亦向所有全職員工及合約期一年或以上的長期合約員工，派發$ 1200農曆新年利市，有員工大呻今年利市較去年$1800縮水。

為了追回下跌的入場人數，今年海洋公園將著力吸華南以及東南亞旅客，會否擔心上海迪士尼搶客？海洋公園主席孔令成認為，旅客「個餅咁大」，不需擔心。

今年情人節撞正人日及星期日，海洋公園營業及市務執行總監李玲鳳（Vivian）推介，可考慮在海洋公園渡過浪漫的情人節，情人節浪漫套票反應仲好踴躍，已有7-8成預訂，情侶可以參加特別版「神秘深海之旅」，先夜遊「冰極天地」睇海獅海豹，再由教育大使帶領下到「尋鯊探秘」紥營，聽大使分享鯊魚不一樣嘅「愛情故事」，徹夜觀賞海洋生物，倒數迎接情人節，成人每位$1,580。

海洋公園副主席劉鳴煒點過情人節？他笑言不會墜入消費陷阱，不會買貴花、送貴禮物，諗住同另一半在家「煮飯仔」，仲話「梗係我煮」，看來他的廚藝應該有番咁上下。