百萬Blogger：給孩子快樂的童年

近日又有學生自殺事件，令我想跟大家講講親子問題，其實親子在理財中佔了一個很重要位置，我相信好多家長都覺得，孩子的消費佔支出一個頗大的百分比，

但其實這些消費是為了孩子還是滿足家長的欲望呢？

眼見好多家長替小朋友安排密麻麻的時間表，先不談論所需要的費用，其實你們有問過孩子快樂嗎？可能你會覺得咁做，只是為孩子好，想孩子贏在起跑綫，但這樣真對孩子好嗎？

究竟人生的起跑綫喺邊呢？更大的疑問，是其實點樣先叫做贏在起跑綫？成績好叫贏？識得三種樂器、四種語言叫贏？如果講成績，每班都有人考第一，就一定會有人考第尾，無可能個個都考第一喎！

不求分數 只求盡力

作為兩個孩子的爸爸，好抱歉我並無幫他們贏在起跑綫，我的責任只是給他們一個快樂的童年，日後條起跑綫喺邊，就靠孩子自己啦！他們自小就一直被我「催眠」：無論每次考試成績如何，我都只會跟他們說「盡了力就可以」。

因為結果已成定局，無論你反應如何，結果也不會改變，一些無謂評語只會對他們構成壓力，對學習失去興趣，變成了求學只是求分數的工具，這樣他能贏在起跑綫嗎？他們會快樂嗎？你會快樂嗎？

我一直覺得讀書能力大部分是靠先天，雖然後天也要努力，但如果先天不足，好似我懶過條蛇，一打開本書就想瞓覺，後天根本努力不到，又有何辦法呢？如果我係你個仔，你會點幫我贏在起跑綫呢？可能你會話一定會教好我，但點教呢？其實我覺得根本無得教，因為如果有得教，同一個屋企，點解我家姐考第一，但我就考第尾呢？

放任政策 效果更好

孩子成績好壞，我覺得作為家長其實無辦法控制，搵多十個補習都無用，只會令孩子更不喜歡讀書。有時家長應該用多點同理心和小朋友相處，你想想有邊個，包括你自己在內，會鍾意被人過分約束呢？

無論大人同小朋友都有一個共同點，就係愈唔俾我做的事我就愈想做，愈千方百計去做，但是當你任由他去做的時候，反而可能會有更好效果。

就以食糖、飲汽水、看電視和打機為例，我相信好多家長也會禁止小朋友任意去做，但我剛剛相反，我屋企汽水任飲、糖任食、電視長開、機任打，你可能會覺得我傻，但結果如何？我兩個仔女好少飲汽水和食糖，一邊睇電視一邊做功課，打機話停就停，因他們知道甚麼時候想做想食都無問題，根本無需要去搏命。

還記得小時候我一去飲宴時就會搏命飲汽水，因為平時無得飲，又試過有女兒的同學到我家玩，不停將糖塞入口，因為平時媽媽不准食，又試過有個同學仔上來打機打到甩褲都唔着返，因為佢話時間無多！哈哈！呢啲就係人性，壓力愈大，反抗愈大！

全文刊於《iMoney智富雜誌》第438期（收費閲讀）

iMoney智富雜誌facebook