張晨：笑唔代表開心

呢個社會，大家都想成為一個「無害」嘅人，所以彼此都選擇咗「笑容」。明明冇感覺，但保持微笑，我稱呢啲為「假笑」。而「假笑」某程度係充斥於生活之中。無論係家庭工作定隨街行過，社會上總有唔少微笑存在。

笑容係因為大部份人都好開心？咪傻啦。只係你知道，9成情況下，笑都係冇死嘅。

邊個教你？唔記得咗細細個總會聽到呢句對白咩？

你黑口黑面做咩啫！笑下啦！

係呀，係你哋班大人教架。由細到大，我哋都被灌輸一種「笑」嘅基本禮儀。

細細個喺學校，你會聽到一句「控制情緒」，其實背後意思即係

麻煩你淨係畀開心情緒我就得啦。

返學咪笑，放學笑多啲囉，總之做人港豬啲，陀地一點，唔好Complain，Think Positive，唔好咁愁，咩都笑下啦！

笑容嘅嘢，多一個都唔嫌多。慢慢你發現，甚至「冇表情」都係錯。咁代表你黑面、唔Nice，大家唔會搵你玩。真心話大家唔鍾意；真表情大家亦唔係咁歡迎。

不過做人嘅嘢，你叫我秒秒真心就難啫，逼我笑半日就好Easy嘅。於是我係幾歲嗰陣都學識掩飾自己嘅情感。有時朋友問：

阿邊個呢排唔開心咩？嗰幾次食飯佢明明好好笑容喎！

面對呢種諗法，我唯有用《回魂夜》個Tone答佢：

笑還笑；開心還開心，兩樣嘢嚟嘅，千祈唔好混淆。

係呢個充滿「假笑」嘅地方，你點可以樂觀到覺得佢識笑就冇問題？

你每日都會喺Wtsapp輸入「笑喊公仔」啦，唔通你又日日好開心咩?答案，你自己都知啦。

原文刊於張晨（鳥不起）facebook，獲作者授權轉載。

標題經TOPick修改，原題為「笑只係一種表情，唔代表開心，千祈唔好混淆」。