藍橘子：Emoji係表達心情定係隱藏嘅面具？

Whatsapp推出愈來愈多Emoji，單係表情已經有上百個。令大家用文字溝通嘅同時，仲可以更清楚表達當時心情。
不過，喺呢個人人戴住假面具嘅社會中，Emoji似乎係用於隱藏真正嘅心情，多過表達自己。

譬如話，個客想你design幅圖大啲、顏色繽紛啲，字體粗啲、出啲，但最緊要夠簡潔。雖然要求好弱智，但你依然會send個笑笑emoji。

一定改到又大又出又簡潔（笑笑）

又例如，老闆send咗個whatsapp畀你…

放假唔代表乜都唔洗理，個客有urgent case，check e-mail！

你簡單覆句：

（OK手勢），

但現實中，你明明去東京，但塊面仲西過西藏。全日用粗口跨國遠程問佢媽媽身體好嗎。

以上呢兩個情況，就算係用電話溝通，你把聲都未必隱藏得住當下失控嘅情緒，但Emoji就幫到你。

不得不提（笑到喊）係一個極具實用性嘅Emoji，就算你講乜嘢，加個（笑到喊）都能夠增添一種「講笑啫唔好認真」嘅和諧氣氛。

喊都無用啦，你咁醜樣！（笑到喊）

又例如對方搞咗個爛GAG，你完全畀唔到反應，覆幾個（笑到喊），對方就會以為你好誠懇咁笑緊。

笑死（笑到喊）

嬲用（笑笑），串人時用（笑到喊）。做PR催人準時交貨呢？明明你畀咗錢佢，硬係三催四請，十問九唔應，呢個時候就要用（跪拜）黎做個溫馨提示。

單單係一個emoji，就已經係一個面具，大家都成為社交高手。既方便又快捷。

我強烈建議E-mail都增設Emoji，因為喺辦公室戰場，就算加咗「Please kindly」，對方收到個意思係完全唔同晒。

條友幾串！特登用Please kindly 黎催我嘢！

不過咁，世上仲有一種無論用乜嘢emoji，都能夠將真實情感切切實實傳遞去你心靈嘅生物。就係女朋友！

譬如

仲塞緊車，可能要遲小小到…
（笑笑）

雖然係笑笑，但你亦感受到一股尖刺般嘅殺氣由手機螢幕度飛射出黎！另外，當我睇親女朋友打嘅文字訊息，唔知點解個腦度會自動轉化成錄音，用佢獨有嘅語氣播返出黎。

所以，面具對於女朋友係不適用的如果你遲到，女朋友send個（笑笑）畀你，代表佢嬲。如果佢send個（嬲嬲）畀你，代表you already dead dead…

你遲到，但女朋友會笑住同你講唔緊要，係一件現實無可能發生嘅事黎。

全文刊於藍橘子 x 萬用上帝的facebook，獲授權轉載。