一箭雙鵰 搭Uber 的士有「快的」禮物收？

Uber 今日搞免費搭的士日，每個帳戶可免費坐兩程的士，不過記者就發現 call 車比較難。

到約下午 2 時，ezone.hk 終於有記者成功 call 到 Uber TAXI。難得坐到免費的士，記者當然嘗試以「乘客」身份向司機八一八，問一問 Uber「燒錢」情況啦！

▲ 司機向「乘客」身份的記者表示，Uber 向他們派發 iPhone 4 一部，用以接 Uber 單。（相片來源：ezone.hk）

雖然都問到唔少料，但都唔夠司機突然叫我「不如裝《快的》app 啦，即時有禮物送」咁爆！嘩，原來有 Uber TAXI 司機一邊收 Uber 補貼，另一邊廂就向乘客推介《快的》，兼幫手做埋「禮物小姐」。

▲ 呢位 Uber 司機都幾「愛」Uber，有個 logo 放在車內！（相片來源：ezone.hk）

是咁的，本站記者約於下午 2 時 call 到 UberTAXI 由港島區出發至新界，途中從司機口中得知 Uber 向司機作出多項補貼，如下：

• 現時約有 200 至 300 個司機使用 Uber 平台。
   
• 向司機派發一部 iPhone 4，但手機經特別設定，只可裝《Uber》程式。
   
• 以今個星期計，每接一程 Uber 單，司機會有 $15 補貼。
   
• 以今個星期計，滿 5 程，會有額外 $125 補貼。
   
• 以今個星期計，滿 10 程，另加 $350 補貼。

問完上述資料，司機建議記者試裝《快的》程式，仲表示成功安裝可即時有禮物送！記者十分驚喜，竟然坐 UberTAXI 會有《快的》禮物收！

▲ 最後有驚喜！司機主動建議記者安裝《快的》，成功安裝後更即時送禮。（相片來源：ezone.hk）

結果一試之下，成功安裝《快的》，下車前從司機心中接過 2,600mAh 流動充電器一個及「即刮即中」卡！記者坐完之後真開心，既可以免費坐的士，仲可以有禮物收，你話「競爭」對消費者來說係幾好呢！

原文刊於：ezone.hk