Docomo 煎餃廣告歌背後的功臣

▲ 相片來源：影片截圖

憑一首類似警察故事嘅廣告歌，Docomo最新廣告Hit爆全城，更引發關於香港價值嘅討論。

廣告狂人特別搵嚟廣告歌填詞及原唱者文曄星接受獨家專訪，親爆廣告製作秘密！

▲ 相片來源：影片截圖

關於文曄星⋯

首先自我介紹一下，我叫文曄星（曄粵音讀「葉」），目前喺日本發展聲優事業。

▲ 相片來源：文曄星 fb 專頁

2014年出演日本富士電視台Noitamina嘅動畫《乒乓》（原作　松本大洋 導演　湯浅政明） 嘅華人留學生孔文革，並於第6話演唱劇中聖誕曲《ひとりぼっちのクリスマスイブ/Midnight Flight》，係日本動畫界、聲優界首個獲得主要角色同首個獲得有名字角色嘅外國人。

另外，又以演員身份出演2014年真人版電影《魔女宅急便》中嘅河馬管理員Morio/モリオ。今年首次以填詞人同歌手身份製作演唱日本電信公司Docomo廣告《3秒Cooking-爆速餃子》嘅廣告歌。

關於爆速餃子廣告歌⋯

當時有音樂經紀搵我，話要搵個識得唱廣東歌兼作詞嘅人，於是馬上答應去做。

當時首歌仲未寫好，對方就send左首DEMO過來話要按這個風格唱，首DEMO就是成龍《警察故事》嘅主題曲。所以可以好肯定，廣告公司／客戶係刻意要製作呢種效果嘅。

如果冇聽主旋律，只聽伴奏，其實係可以將警察故事嘅歌詞完全代入首歌入面。

關於填詞嘅內容⋯

製作公司根據廣告內容畀左大意，再由我自己發揮。當時對方畀嘅原文如下：

ニラとニンニクはお好みで
いざ進め、皮めがけ
激しい炎を突き抜けて
ナイスキャッチ！

最後我寫成以下歌詞：

加啲韮菜更好味 伴著大蒜香
衝，再快衝，衝進，餃子靚皮裡面
火柱高升千呎，熊熊烈焰裡穿越
接得好

（網上咁多版本，呢個一定冇錯！）

將來計劃

喺香港發展音樂事業一直係我嘅夢想，我好希望呢首歌能夠正式進入香港市場。我亦希望有更多我填詞同演唱嘅歌能夠面世，畀大家帶來多一點歡笑。

文曄星去年發佈嘅短片：http://on.fb.me/1EMzXRS

原文刊於廣告狂人facebook，文章獲作者「廣告狂人」授權轉載。