張晨：Typhoon Mood真係仲衰過Holiday Mood

Holiday Mood，泛指假期前或長假後，由於個心已經飛到九丈遠，搞到上晝等下晝，下晝等收工嘅情懷。呢段時間你工作效率跌到得返50%，不求有功但求合格。

雖然工作效率由平時150%插水到50%，但身體機能、大腦思考均保持正常，你依然係部稱職嘅working machine。

但係Typhoon Mood就大鑊好多！所謂Typhoon Mood，即係你知道有機會打風，但係未打！

就好似「望夫石」一樣，你等，但唔知等幾耐。喺辦公室入面，你已經失神。一邊幻想下午走得，可以返屋企瘋狂訓覺；另一方面又抑制自己，同自己講香港有李氏力場，分分鐘夜晚8點先打風，唔好咁大期望。

基本上思想已經失調，老闆話「打算要咁」，你聽到「打風要走」；同事講「下月8號開會」，你聽咗「下午8號風球」。

不斷嘅新聞消息接踵而至，碼頭實況同清潔阿姐一齊以訛傳訛。你接近痴線，幾近瘋癲，一邊打文件；一邊諗住閃。隻腳已經擺係路邊，學「讀心神棍」話齋：「你好想走。」

▲ 相片來源：香港天文台

綜合以上各點，你心神恍惚，患得患失，工作效率跌到10%。嗰10%只係支援幾個動作，包括「上網睇8號風球未」、「同隔離位阿強傾8號風球未」加上「隨時執嘢走人。」

呢個時候，對於一堆「下午掛八號」同「朝早最接近」嘅消息，你只係想知「下午」即係幾時；「朝早」到底有幾早。

老闆們，當你見到員工有以上心理狀態，證明佢坐喺度都係浪費緊你啲冷氣。

不如，放佢走啦好嘛？

原文刊於張晨（鳥不起）facebook，獲作者授權轉載。