張晨：書簿費之謎

細細個已經唔明，點解要買書。

好記得小學有段時間，數學Miss自己印咗好多Notes畀我哋，上堂就用佢啲Notes，本書原封不動。成為首本即使缺少包書膠都冇「披口」嘅書。

嗰時我開始諗：「其實書單嘅書，係咪唔需要買晒呢？」

於是喺新學期，我嘗試作出篩選，但阿爸阿媽梗係唔信我，始終都係買齊晒。

一次又一次嘅買齊晒；一次又一次嘅用唔晒，新淨嘅書堆積如山。如是者到咗初中時期，大個仔，可以自己出街，就發現大街小巷都係一啲短期經營嘅「二手書店」。

嗰時覺得此舉實在太聰明，一手書貴到飛天循地，二手書咪好囉！自己二手完可以再轉售，幫輕到屋企又可以提供平價書畀人！真係轉角遇到天使！

念頭一到，立即衝返書企將所有較為新淨嘅舊書拎晒出嚟！心諗：「呢次富貴啦！買《遊戲王》卡獎勵自己是常識吧！」

「呢本書改咗版啦，我哋唔收啦。」

店員姐姐嘅回覆將我玻璃一樣嘅心變晒冰之碎片！

What？唔收？ 

好啦咁，放唔到書，咁我都要買平書嘅。

「呢本書今年改咗版啦，我哋得舊版，你要唔要？」

What？改咗版？

由嗰日開始，我意識到「改版」將會喺我未來嘅一個大敵。

坦白講，中學年代教科書嘅改版，基本上係「調頁數」遊戲；又或者係啲例題改下數字人名咁，講嚟講去都係嗰啲嘢。

其實點為之「改版」？
我理解係當教材不合時宜，整個方針內容需要重新編撰，先需要「改版」嘅。

但係而家啲「改版」純粹係為咗「唔畀你買二手書」。

我都試過懶理佢啲所謂新版，照用舊版！
其實內容90%相似，都係睇落好勁，但講唔出咩大道理。

但頁數就完全唔同，有一本好似係地圖之類，老師話掀去78頁，我就要搵到84頁先見到。

依啲都冇所謂，中學啲書已經一百蚊左右，上到高中啲參考書成本字典咁，三百蚊本。

就當係自己窮買唔起新書嘅代價。

嚟到呢個年代，上網方便，「Yahoo知識」仲快過問老師。

學校都提倡多媒體教學。

但反而買書嘅清單好似不減反增，甚至多媒體關係，搭多隻CD又可以收貴啲。

呢個時候就會諗起以前個數學老師，如果佢仲教緊書，分分鐘Notes都唔使Print，send個網址畀同學上堂就OK。

不過應該都冇可能啦，老師肯，學校都未必制。

究竟教科書同學校之間有咩關係，同政府係咪又有咩暗Deal呢？唔敢講話有，但一定唔會冇囉！

書簿費呢樣嘢，好多家長都盲目跟送，因為呢個生態已經持續咗十幾廿年。

但呢個生態正正就係教育嘅根本問題。

原文刊於張晨（鳥不起）facebook，獲作者授權轉載。