張晨：將工作帶返屋企就好似吸毒...

「份嘢返屋企再搞啦。」

呢句可以話係大部份打工仔嘅常用句子之一。無論係自己講畀自己聽；同事話你聽；或你話畀同事聽、呢句「返屋企再搞啦」嘅出現率都奇高。

都係嘅，有時個頭已經痛到PK，天色已黑。你望住窗外嘅回家隊伍，都會忽然懷念逼到爆炸嘅港鐵車廂，思起鄉來。

你想收工。

不過「想收工」同「可以收工」嘅距離往往相隔幾百個銀河系！

聽日份report、quotation、projectplan點都係要交；會議亦一定會進行。但你又真係好想返屋企！所以你心底會出現「返屋企先做啦」嘅諗法。甚至隔離位嘅同事見成個人乾咁，都會好心一句：「你咁攰，返屋企抖下先做啦。」

香港人好習慣呢種生活模式，返工係返工；放工都係返工。有人連發夢都關公司事。

習慣只因身邊人人如此，積少成多，聚沙成塔，自古少數服從多數，都市人照辦煮碗，同化其中。

不同幾年前有位朋友同我講：

我一定唔會帶嘢返屋企做。就算OT我都逼自己喺公司做晒先走。一放工我就唔會諗公司嘢，唔係咪冇晒生活？

 

加上試咗第一次帶嘢返屋企做，衰過吸毒，一定戒唔到！從此你心中多咗個「返屋企做」嘅選項，變相你喺公司會冇咁落力，因為你已經本能地將返工時間由9am至6pm變成9am至9am，廿四小時個心都係工作緊，遲早就痴孖根！

其實好有道理，9成香港人都係「公私不分」，公還公；私還是公。

勞碌幾廿載，得到一句GoodJob、一身樓債、數不清嘅目標（未完成）、幾百部冇時間睇嘅戲、千套未望到結局嘅連續劇、仲有呢場踢到67分鐘嘅fifa。

可惜，好多嘢你真係冇得揀，亦唔到你揀。呢排，同返嗰個朋友飲嘢，酒過三巡，佢話要返屋企做埋公司啲手尾。

我即刻問：

你唔係話死都唔帶工作返屋企㗎咩？

佢笑一笑：

係呀，不過後尾我發覺，如果做晒先返屋企，即係唔使返屋企，哈哈。屈服咗啦。

公司下的長街也許只是走廊，樓下花園像個Pantry，鐵閘大門內不是你的家，純粹是個較為自由的個人辦公室。

這個「不帶工作回家」的堅持，我進入社會大學第3日就屈服了。

你又堅持到幾耐？

原文刊於張晨（鳥不起）facebook，獲作者授權轉載。標題經TOPick 編輯修改，原題為〈「將工作帶返屋企」就好似吸毒，試一次就返唔到轉頭〉。