莊偉忠：做生意的三堂課

嘲笑對手失誤，笑兩聲，人之常情，適可而止，係咁笑唔停，即係惡意喺人哋傷口灑鹽，嘥時間嘥精力，自己唔會叻咗，公眾形象差咗，刺激對方同仇敵愾，分分鐘打高兩班波，唔好咁儍。

輸就要認，錯就要企定，砌詞狡辯，死雞撐飯蓋，唔肯正視失敗原因，即係輸完再懲罰自己一次，呃到自己，呃唔到隊友，更加呃唔到對手，公眾形象差咗，打擊團隊士氣，整體肯定退步咗，唔好咁傻。

贏，細細聲贏，自己知，自己人知，心知肚明就得。
輸，大大聲輸，自己知，對手知，知恥近乎勇至得。

做生意係分站長途賽，贏輸唔係一鋪過，只要輸咗之後勤力咗醒咗，士氣好咗，又或者贏咗之後唔會懶咗鈍咗，戰意唔會鬆懈咗，長遠至有機會爬過或者𡁻低對方。

舉一反三，任何要同人鬥餐飽嘅競爭遊戲，處理方法差唔多。繼續嘲笑，繼續死不認錯，繼續招招積積大大聲話自己贏到開巷，肯肯定畀自己人背後唾棄，或者唔知唔覺畀對手淘汰咗，遲早無得落場再砌過。

原文刊於莊偉忠facebook。獲授權轉載。