9GAG創辦人：令人快樂好有價值
發布時間： 2015/11/27 11:32
▲ 相片來源：iMoney智富雜誌
「我不是真係好鍾意搞Gag！」偏偏陳展程（Ray）就創辦了一個揚名海外的「搞Gag」網站「9GAG」。
這個以令人快樂為本的爆紅網站，現時每月俘虜全球1億人。港大法律系出身的他，口才了得兼轉數快，曾當財經新聞台主播，有自我一套賺錢哲學：
產品如可製造到價值給用戶，賺錢應該無難度。我哋相信，當你做嘢唔係為賺錢而做，反而容易賺錢；當你做嘢淨係諗住點賺錢，其實就好難賺錢。
9GAG現時主要靠廣告收入，是否賺得夠？Ray笑言仍有進步空間。這名80後衝出香港的Startup故事，自然成為不少年輕人學習對象，據知他出席的分享會場場爆滿。當年放棄做律師，反而寫App創業，是看通了一點：
地產炒樓，你點會熟得過李嘉誠先生？但邊個App最潮，你可能會熟過佢。
9GAG（九GAG）廣東話讀起來諧音是「搞Gag」，靠分享搞笑圖片發圍的這家初創企業，成立4年後獲多個美國創投基金注資280萬美元（約2,170萬港元），每月俘虜全球1億人瀏覽。
講的不是甚麼外國網站，而是百分百屬於香港土生土長80後的Startup，衝出香港名揚海外的故事。
創業必需付出努力
一個出身港大法律系的大學生，點解會無端端跑去「搞Gag」？
簡單講係大學無讀書，成績比較差，所以無繼續讀上去。（讀法律成績不會差吧？）入學時成績唔差，但入大學有好多叻同學而又要讀書。
經常到大學講就業講座的Ray，有句說話想跟準大學畢業生說：
如背景係屋邨仔出身，爸媽也來自草根家庭，（揀科）方向多會叫自己要做專業，現在反而想話俾人聽，不一定要做專業人士、不一定要讀Master，假如想有另一條出路，可加入初創企業，或自己創業。
但我從來不鼓勵人創業，因不是個個人都啱，創業不是只有光環，付出時間可能比打工多，打工你好求其咁做都會有糧出，但創業好Hea不做嘢，嗰日就無飯開。
他認為只是傳媒近期狂吹創業風才會令那麼多人留意創業。他以過來人身份指，大學揀科未必代表那科是自己想做的，其實在專業以外可以另有出路。
在網上或以App創業，成本相對較低。
只要肯寫個App出來，其實已是一個開始，寫App創業吸引年輕人的地方，是因為他們熟悉啲，如地產炒樓，你點會熟得過李嘉誠先生？但電腦你可能會熟過佢，例如甚麼App最潮。
9GAG精神：令人快樂
Ray強調，自己並非放棄高薪厚職的創業故事。畢業後，他試過任職銀行法規部，又做過電視台主播及記者，但他不想這樣就一世。2007年轉投互聯網公司，形容「好似開拓新世界咁！」終找到自己興趣的Ray，公餘找來弟弟及幾個朋友搞科技項目，其中一個是9GAG，也是唯一做出成績的項目。
「我不是真係好鍾意搞Gag，而是那刻想做一個分享有趣圖片的App就去做。」9GAG在海外網絡界爆紅，Ray認為與社會氣氛及開心題材不無關係，
你令人開心呢件事，唔係咁簡單，唔係無價值，用戶會好多謝你，解決唔單止係自己問題，而係解決全球人的問題，呢個就係價值！
Ray還會跟同事說，篩選搞笑圖片的工作是有意義及無價，
To give people power to make the world happy，其實係好有意義的願景。
員工享無限大假
每間公司都有不同文化，Ray形容：「有些（文化）好廢、有些很吸引，就好似人有不同性格般，只不過有啲得人鍾意咁解。」而他的公司今年行了一個新制度，相信會是不少打工仔夢寐以求的——無限大假制。
請得番嚟都係成年人，自己應明白點安排工作，或是否要人執你爛攤子。如今年結婚生仔咪攞多啲假，不想同事因攞晒假就詐病或就住就住。我哋強調Freedom及Responsibilty係相輔相成，你有自由度做決定，決定同時要有責任。
Ray不會問員工點解要放假，也不想行申請制度，反而是員工要求「點都要講聲」，其後才有所謂的審批制，至今也沒有不批假的情況出現，
大前提係你要做得好工作先得，係講信任，我信你唔偷懶，你信我唔會刻薄你，有咁嘅健康關係先得。
（節錄）
全文刊於《iMoney智富雜誌》第422期（收費閲讀）
撰文 : iMoney智富雜誌
