老闆唔該你停一停諗一諗

一個緊張大師既老闆，係好易令員工情緒崩潰。每次老闆一用力打開度玻璃門想開口個一刻，大家就會警覺，開始冒汗。

唔係要你趕野，就係大聲夾惡搵人出氣，咪洗旨意有好野。

老闆做野係根據怕得罪客既程度黎分先後，遇到搞唔掂既煩客打黎，事無大小，淨係識「係、係、係」既對答，然後一收線就會好鼓燥咁衝過黎。

同事有時俾佢突然間咁大既動作會嚇到即刻企起身，以為有大件事要咁急，原來不過係幫個客申請claim番搞活動既開支。

「阿晴，拿拿聲同我入晒啲單俾Account個邊，好似四點鐘cut數，我即刻入房e晒啲單個黎俾你。」

抬頭望一望個鐘，顯示為三點四十五分。「老闆……我手頭上呢……」阿晴既眼神極度無助，明明雙手無係keyboard停過，要五點前要入晒百幾張sick leave form俾經理出report，仲要無啦啦俾老闆踩多腳，加多對手做唔切啦。

我地打份工既，做野係睇階級高低黎分先後，作為同事於心何忍，因為我地隨時係下一個受害者，就快手快腳幫阿晴分類整理好啲單。

「係咪得啦！我要覆番個客啊！」三點五十五分，心急如焚既老闆又催，「double check緊，我叫左Account俾多十五分鐘等埋我地既，你放心……」

老闆行過去阿晴旁邊望到個mon實一實，指手劃腳指揮佢入data手腳快啲，「點搞啊？又打錯字？你睇清楚先啊好唔好？」阿晴忍住度氣，keyboard聲愈打愈響。

同一時間，一連串既高踭鞋聲出巡，驚嚇不斷。「咦？你咁得閒係度整啲claim單既？唔記得我叫你入假紙？」同老闆乞人憎既口吻如出一轍。

「入左大部分架啦……頭先老闆話要……」正當解釋之際，老闆有感自己面子受損，「我係叫佢urgent幫我搞左啲claim單先既，用佢十五分鐘時間姐！正常唔會影響到佢做其他task架喎。」

係呢個時刻唔識出面維護，兜兜轉轉，又將個波一腳踢番俾個「因為聽你話」而受氣既小員工度。

入職時聽聞老闆以前由低做起，應該好明白基層既辛酸，不過好快就發現佢做老闆過盛既氣焰，周不時無理咁惹火頭。

而且佢係典型既結果論者，當員工係工具，我地日曬雨淋幫佢䂿石仔，就算成功起到層樓，都只係「工作需要」，從來唔理會其實係同事「抵得諗」、「肯搏」。

老闆，唔該你停一停，諗一諗。你出糧俾員工唔係一份功勞，係責任。員工肯落足心機做好份工唔係責任，其實唔多唔少係願意為你加上光環既一個行動黎架。

原文刊於HR熊 - 職場航行日誌，及其facebook專頁，獲授權轉載。