HR面試奇遇記 來自天神的CV

職場 11:46 2015/12/04

分享:

圖片來源:iStock

話說薯蓉仔我間公司周不時會有來自天神嚟嘅禮物...呀唔係...係來自天神既CV。

呢d天神嘅禮物,凡人幾唔想擁有,你都一定要硬食。有一次,一位天神賜左個神之子落嚟,地球名字為Juno,話想做某某職位,皇呀姐就叫我去會一會佢,睇下神之子想係地球有咩作為。

坐低望住Juno,睇見佢一身T shirt 波鞋,嘩!個件白色底衫...唔係..係白色t-shirt,係好貴嘅美國brand,我平時著開菊花牌底衫㗎咋!

Fashion嘅野我識條鐵咩!見佢一身人類嘅打扮,心諗佢一定係為左親民所以著成咁,頓時感覺到佢個頭有頂光環,神真係偉大!

於是我好客氣咁問Juno:

其實今次都想了解下你既興趣,點解你會想做呢個職位?

我啱啱畢業,想搵份長工試下做。

原來Juno既興趣就係想試下返工既感覺!下次見工填相關興趣個欄都寫鍾意返工先!

呀...但係諗諗下佢好似冇答我呢個凡人嘅問題,所以我換個方法再問一次:

「咁你自己有冇target? 或者有興趣做咩類型既工作?」

「我自己本身鍾意玩音樂。」

「即係想從事同音樂有關既工作?」

「係呀,我自己屋企有個studio, 自己平時都有搞下音樂,錄下音夾下Band咁。」

對於我依啲住係山腳既平民,可能Juno個Studio重大過我成間屋!咁你做咩唔乖乖地係屋企搞音樂呀?

藝術嘅野我識條毛咩 其實父皇想呀仔去凡間做嘢都唔好搞到我地啲薯仔公司丫!

事實如若告訴你或更內疚,我地公司有搞開音樂嗎?似乎沒有!

「其實我地公司就無咩職位同音樂係相關嘅。」

「做其他職位我都ok㗎,我可以係屋企studio度搞音樂。」

鳴呀!聽到依度我都眼濕濕!佢竟然為左「試下返工嘅感覺」而放棄自己嘅理想呀!太偉大喇!但佢好似聽唔明我嘅意思…依間薯仔公司無職位啱你呀Juno…

「有冇諗過自己投身社會之後嘅career path?」

我希望可以係自己studio做自己鍾意嘅音樂,不過我唔想靠屋企,想憑自己能力搵份工試下吸收社會工作經驗,之後先繼續搞音樂。

其實玩左我咁耐,Juno你嘅夢想已經達到啦,太悶想落嚟凡間呼吸下? 而且你今日上嚟見工都好似都係靠你父皇幫你㗎喎...

好明顯成件事都係「羅生門」!唔好諗住呃我呀!我寧願信娃娃舜都唔會信你㗎!歌都有得你唱啦!

「像你真心真意相信舜 知否我也相信舜 Yeah!I believe!」(原作:真·娃娃舜,舜自己)

經過一輪與神之對話之後,得出既結論係Juno已經贏在起跑線。成件事嘅勵志程度同之前《教你八千月薪如何買林寶堅尼》一樣,成功需父幹呀!

Juno你最好乖乖地係神殿提取溫暖度嚴寒,就關起那band房,慢慢搞你神聖既音樂啦,唔好嚟凡間打擾我地黎民百姓喇。

最後我同皇呀姐如實稟報之後,過左一段時間都冇再聽到Juno既消息。可能佢發現凡間既空氣太混濁,地球實在太危險喇!所以決定留係神殿啦。

希望佢早日同G-龍合作推出佢嘅神龍專輯!我撐你㗎!至於今次interview,贈你一句:

別瘋狂 下個一月 讓前塵沉澱於 福島某地方

原文刊於HR小薯蓉,獲授權轉載。

撰文 : HR小薯蓉