出賣職場姊妹情

講出黎都慚愧，自己做左呢行幾年，係人事關係上仲未學精，警戒心太低會俾位人入。

係office，年紀相若既一班女仔好易聚埋一齊，表面上好歡樂，講飲飲食食化妝扮靚，一齊注視男神target，又會呻下公事，不過私底下好少交流。

平時嘻嘻哈哈當然唔會流露一個人既真實性格，一有利害關係就容易露出尾巴，而女人更加係你估唔到有幾口不對心。早前部門有個空缺，大家一早知阿Jane恨左好耐，夠年資又識得個空缺位既新「掃把」，佢申請既話應該十拿九穩。

而同一時間，有傳會開多一個新職位，我心思思想申請，所以就走左去問下班姊妹意見，可能佢地收到風有多啲資料參考下呢！

咦？點解無聽你講過對呢個職位有興趣既！嗯……經理有無叫你去申請先？

Jane同一位經常出雙入對既姊妹表現得好愕然。

無啊，唔係自己想就報得架啦咩？

我呆頭呆腦直接問。

可能你未有經驗啦，我地呢度一向既習俗係有人推薦去申請先有機會架，同埋呢……聽聞好似有心水啦！不如等下次先？

果然，佢地係知道啲內情。

有得升職加人工既位，報左先無壞，雖然我都知年資唔係幾夠，不過睇下夠唔夠料爭取到interview機會都好啊。

當時仲覺得panel又唔係得一個人，就算今次內定左，話唔定覺得我有某啲合適既條件岩做其他位呢！

咁既……唔怕講埋你知……其實未confirm呢個位係咪有得長做架，唔係筍位黎，聽聞一年後無budget會逼住變返做temp位，仲好似要返shift添！

空穴來風，未必無因，就只係最後兩個原因已經足以令我放棄。一直以為姊妹「好心」講我知真相，等我唔洗為左一個辛苦位盲搞一輪。

招聘deadline過左幾日，同個senior食lunch時咁岩佢問起我有無留意呢個職位，因為佢就正正係負責處理今次招聘既同事。

阿熊，你都知啦，黎緊個新位會係Kitty轉過黎，都幾乖女架佢。

一聽到個名就開始有啲疑惑，

我無記錯既話，Kitty咪係Jane佢地個死黨？

senior好爽快咁講，

梗係啦，Jane咁口密？係佢介紹俾經理架嘛，Kitty轉左新位應該日日可以準時收工，個新『掃把』又咁好人，執到啦……

依稀仲有一大段呢個筍位既簡介……不過已經聽唔落去。

神推鬼拥知道真既「真相」，係姊妹既話，不妨老實同我講已經有人選，反正結果都一樣。之前太單純誤以為姊妹係為我著想，原來只係一種手段去擴大小圈子，至少，知道自己對其他人黎講算係一個威脅。

選擇職場上既「姊妹」等同押注，押得岩既，事無大小都預埋你一份，分擔工作上既辛勞。押錯左既，有起事上黎就左右推塘，甚至不留情面暗啞底出計仔打壓你。

你話啊，姊妹呢樣野幾咁可怕！

文章刊於作者HR熊 - 職場航行日誌 Facebook及個人網頁。