5個唔講唔覺的工作壞習慣

個人返工都有一個共同目標，唔係幫公司搵大生意，亦唔係做一個乜野攞哂獎嘅marketing campaign，而係準時收工！

但其實好多時候，你會因為一啲唔覺唔覺嘅壞習慣，令你OT多咗幾粒鐘。大家留意以下幾點，除咗幫你減低工作壓力之餘，仲可以增強社交，提早收工～

出盡奶力拍mouse

唔知各位做agency嘅朋友覺唔覺，唔知點解公司啲mouse成日都壞。如果你覺，你要留意下。

工作遇上困難，又或者電腦係你save 時死機，心情唔好在所難免，但因為咁而大力拍mouse，其實都係無補於事，拍完隻mouse，電腦又唔會快咗，拍完又唔係可以即刻放工，之後未又死死地氣繼續做。

而且mouse拍多幾下會壞之餘，旁邊嘅人都俾你嚇壞，上司覺得你唔能夠控制情緒，下屬都怕咗你。不如留返啲力，去厠所將脾氣「沖走」，學方東昇話

工欲善其事，唔好發脾氣～

「搞錯呀，淘寶唔叫埋我～」

我成日覺得，淘寶某程度上係一種「社交」，呢種「淘寶社交」其實係每個辦公室都扮演著好重要嘅角色。如果係公司許可／適當嘅時候淘寶其實冇乜問題，問題係在於你淘寶時記得叫埋我～

唔信你留意下，當你每次出去收件時，其他同事嘅眼神係幾咁渴求、幾咁嫉妒同不滿，不滿你集運唔叫埋我，嫉妒你「淘」倒好野唔分享，佢哋唔出聲都聽得出一句「淘寶又唔叫埋我」～

所以，如果大家「淘」得合時，以「淘寶社交」係公司結交好友，未嘗唔係好事。

講野太大聲、玩得太興奮

做marketing工作壓力好大、成日OT好辛苦，係人都想鬆一鬆。同同事吹下水、玩下手指其實無傷大雅，但玩時玩，唔好太過份、太興奮。

因為當你好努力玩嘅同時，仲有好多人都好努力做緊正經野；當你大大力吹水時，仲有好多人仲同客傾緊電話。

試想想，如果你想快快手手做埋啲野走人，但偏偏遇到其他人嘻嘻哈哈，大大聲吹水，你唔眼火爆就有鬼呀～ 所以玩時玩，低調啲啲啲啲啲啲啲

開工唱歌

以前做過一間公司，坐我旁邊有一位同事聽耳機時，好鍾意細細聲唱埋一份。明白工作辛苦聽下歌減壓係正常，不過你一齊唱減壓，其他人可能一直係度「加壓」。

有時細細聲唱歌，個感覺好似俾烏蠅 “嬲” 咁，唱得好聽由自可，唱得差你真係想打爆佢，有時唱到高潮位突然好大聲，真係想一個mouse車埋去（同上面講拍mouse唔同，因為呢下車埋去真係幫倒件事）。所以，盡量唔好唱，拜託拜託。

正面／背面講是非

呢個係辦公室世紀問題，個人覺得做marketing同agency特別嚴重，遲下可以開十個posts同大家討論一下。

公司遇上人事問題、工作問題係十分常見，唔開心都係正常，但將佢變成是非其實唔係好事。更加唔好「是非當人情」、或者「無風起浪」，果一刻可能冇乜野，但其他人／當時人見倒，唔多唔少一定會反感。

「一隻手掌拍唔響」，你講人事是非，代表住或多或少你都有問題。

與其每日用2個鐘去去抱怨、講人是非、話邊個邊個乜乜乜，倒不如用呢2個鐘快快手手做埋啲野走人，留返啲口水放工去唱K好過啦～

原文刊於《我做Marketing》facebook專頁，獲作者授權轉載。