百萬Blogger ：人靠衣裝的迷思

早前出席了一個招聘講座作講者，談及消費問題時，有一位現場聽眾問了我一些問題，好值得同大家分享。

平日一定做功課

當日我談到不以溢價消費，隨即有觀眾問應如何格價才不會多付溢價？

其實每次買東西也格價真係費時失事，而且香港人咁忙，根本無時間慢慢格價，所以需要平時多睇多看，即唔買都要睇吓，到你需要買的時候便心中有數，知道哪裏買會更平更抵。

例如有時約了人未夠鐘，我都會到附近舖頭逛逛，比較一下價錢，當同一件貨品在不同店出現，就會知道邊間「食水深啲」，第日要買就不用再四圍格價！

讀者有沒有留意有些地方長期貼上「執笠」，執了好多年仍在執？

其實他們就是玩心理戰，如果平時你無做開功課，見他們說執笠清貨大特價就以為好平，其實可能中招而不自知！

當然這些只是小數目，買貴了也無所謂。但如果是投資，平時你無做功課，到臨急先抱佛腳，你又點知有無被人搵笨呢？

所以我以前視睇樓為生活的一部分，雖然我買入第一層自住樓後，未知幾時會再有機會買第二間，但每逢有空仍會看看最新成交，去開探朋友又會睇返一兩間，起碼心目中有個印象甚麼單位值甚麼價錢，叫價和成交距離有幾多，到真正要買的時候便有概念了！

老套都要講句：機會是留給有準備的人，得閒要做功課，而且並非一朝一夕就有成果！

人靠衣裝的迷思

另外，觀眾又問了我另一條問題，就是我全身由頭到腳衣着都不過200蚊，不怕被人笑嗎？

其實我從來不覺得如果件衫多隻動物就會高貴點，追求名牌可能是人生必經階段，但當我發覺我這種五短身材，穿不穿名牌根本就無分別，如果你天生麗質，隻動物又點會搶到你鏡呢？

好多時我們太在意別人點睇自己，其實我們並非為別人而活。你穿名牌想表達甚麼呢？告訴別人你是有錢人？代表你花得起？當你見過有人用「英文字母銀包」但裏面只得廿蚊，你又會不會對用名牌有另一番體會呢？

正如當年我23歲置業，我身邊朋友都情願買車去追女仔，還笑我是樓奴！笑我為了買樓無晒人生樂趣，如果我當時介意的話，我諗我依家就不會有個專欄跟大家發噏風！

所以做任何決定，都只需要為自己交代，別人點睇真是咁重要？雖然有好多人話人生如舞台，但我不介意在一個屬於我自己而無觀眾的舞台，因為這個舞台是無得收入場費嘅！哈哈！

全文刊於《iMoney智富雜誌》第424期（收費閲讀）

iMoney智富雜誌facebook