百萬Blogger教你揀個好地產經紀

City 17:28 2015/12/22

分享:

施永青先生不愧為我在地產界唯一偶像,雖然他背負地產代理之名,好多時被人話其言論幫住地產代理,永遠大好友的印象,如果你這樣想,表示你個人較主觀,亦不太了解佢!

就似早前在電視台節目《網絡挑機》中,有網絡紅人問他有沒有提供筍盤的經紀直綫電話,施生答得好中肯,他說:「聽經紀點,害人不淺!」我立即笑到標眼淚,並非因為我認同,而是這句話竟然出自施生口中,我實在佩服到不得了!

無能經紀 樣樣Say No

《富爸爸‧窮爸爸》書中提及要善待經理人,包括律師、會計師和地產代理等,對我來說最重要的當然是地產代理!因為整個投資成功與否,其實也取決於你有沒有找到一個好的地產代理。

有人看完《富爸爸‧窮爸爸》說要善待經理人,便盲目去善待,很多時是「癡心枉種」。所以揀樓前,最重要是揀一個好的地產代理,那究竟點樣可以揀到一個好代理呢?

記得多年前有網友邀請我陪睇樓,做了好詳盡功課和分析,我見他如此有誠意就陪去他去睇啦!見面前我叫網友先約5個該區經紀睇樓,睇完樓之後我跟他說,以後只需找其中兩個睇樓便可了!

揀Agent其實好容易,我跟5個代理、每個睇一層樓,每個單位也有還價。甲經紀想也不想就說這個價不可能,說昨天已有人開過這個價,但業主不肯。我立即跟他說:

昨天業主唔等錢使唔代表今日唔會等錢使,叫佢自己返去諗吓尋日食咗飯點解今日仲要食飯?

乙經紀聽到我的還價後也說這麼低沒有可能,我便跟他說:「你是業主嗎?你怎知無可能?」到丙經紀聽到我還價後,即表示還呢個價會俾人鬧,我就話:「你咁驚比人鬧就唔應該做代理啦!」

首要條件 盡力還價

最後,卒之給我遇到個好代理,丁經紀聽完我還價之後,即刻話個價是低了點,不過都會試試還價給業主,看看反應立刻通知我,呢啲咪做到嘢囉!

至於戊經紀則提議我落票去試,這起碼代表阿戊不會化身業主,日後可以繼續找他幫手。

如果經紀連試都未試就同你講無可能,咁你話佢會唔會幫你入到個靚價呢?

千萬別少看這個環節,曾經有朋友搵我幫他還價,當時他跟A代理看了一個單位,開價260萬元,我叫朋友還240萬元,經紀回覆說最平也要255萬元,但我收到同區其他代理報料,這單位底價應是245萬元,我就叫朋友跟經紀講,如果他還不到245萬元以下,那就搵第二個經紀好了,當時那經紀便露出了無賴的面孔,說:

你咪去跟第二個買囉!佣我就照收,你簽咗睇樓紙咪試吓唔好俾囉!

所以你話揀錯經紀係咪真係後悔莫及呢?

全文刊於《iMoney智富雜誌》第426期(收費閲讀)

iMoney智富雜誌facebook

撰文 : iMoney智富雜誌 百萬Blogger財叔