曾智華：葉問與甄子丹

《葉問 3》上畫，我肥碌毋須等口碑，即時真金白銀入戲院捧場。因百分百肯定，甄子丹主演及袁和平武術指導，必定交足貨。

《葉問 3》百分百為商業片，所以充滿商業計算。呢個系列，最不用關注為劇本，真真中學生都識寫，總之，照抄半世紀前黃飛鴻系列公式已掂——葉問為高手，遇挑戰，忍讓，老婆兒子或徒弟被迫害，葉問最終出手，大勝。

此片編導黃子恒任務非常簡單易做。最難度高，當然屬武術指導，因早前由洪金寶設計武打，如今改為袁和平，你係袁師傅會點心態？最怕貨比貨，唔衰得也。

一如所料，《葉問 3》最好看的，正是武打，場場燦爛，打到開花，硬橋硬馬之下，主角紛紛受傷，乃正常而非意外。事實！拍攝時，泰臣手指骨折、甄子丹被張晉劈中鼻樑掛彩，用英文講，真真 well expected。

此片幕後商業計算，最神來之筆為搵到過氣世界拳王泰臣扮大奸角。呢位老兄，雖則退役後生活坎坷，但其拳風仍然犀利無比。肯定，無戴拳套，一招質落，對手肋骨必全斷裂。

《葉問 3》在香港及內地大收，應無懸念，我肥碌倒有興趣知道甄子丹點諗。因為，佢老哥近幾年，真真正正大收又有口碑的，只得《葉問》系列，無《葉問》，呢位「宇宙最強」可能會慢慢過氣。所以，《葉問》靠佢，倒轉，佢亦靠演《葉問》維持人氣。

記者問：「會否開拍第四集？」肯定，老闆黃百鳴絕對有此意，問題在，如何在片酬方面，與甄子丹玩 show hand？比戲中橋段更精采！

原文刊於《經濟日報》。(收費閱讀)

標題經TOPick 編輯修改，原題為〈葉問的市場計算〉