HR熊：瑤柱蛋白炒頹飯

今年十二月唔知係咪好年，一個月去左幾餐飲宴，荷包少量出血，但眼見相識好耐既朋友同真命天子對望既幸福眼神，一世人一次，再唔會想去計較個少少錢。

新人擺酒最擔心都係怕係親朋好友面前做得唔夠體面，就連係台上既致謝詞都會多左多謝當晚婚宴場地既工作人員、婚禮統籌師、攝影師、錄影師等等，務求大家高興，唔好有任何hard feeling，留低一個美好回憶。

細個跟爸爸媽媽去飲，從來無意識到去幫手鋪排整個喜宴各式各樣既人有幾重要，淨係以為俾左錢就一定有服務，唔滿意就可以出聲鬧。

到左自己出黎做兼職，先了解到待遇真係好影響到員工工作既動力，香港既打工仔要求好簡單，老闆你俾我應得既回報，我亦會盡力交貨，互不拖欠係最基本。

就今次事件，主人家相信酒店既安排，但無預計到一間一向高評價既酒店，竟然會上一碟碟令人有咁大迥響既蛋白炒飯。

攝影師、錄影師既成隊crew，由早到晚跟足全程，拎著重身既相機、錄影機一邊拍唔停一邊度定剪接咩鏡頭，係緊迫時間裡面堆砌出最出眾既效果係婚宴中播出。

體力上不停既勞累，加上周遭一班賓客望實你拍攝既壓力，等到新人安排休息環節時間時，眼前只有同自己嘴巴一樣乾巴巴，臉色一樣白茫茫，只有丁點菜心莖點綴既炒白飯，仲有胃口嗎？

有經驗既婚宴攝影師就知道盡可能由新人打點膳食會較好，如果由酒店負責安排，食物質素無保證，而且一般酒店廚房會提早預先準備crew meal，所以當工作人員用餐時，飯已變冷，比快餐廳既頹飯更難食百倍，到時先黎申訴已無用。

新人可以安排買外賣，又或者如果有親友唔能夠抽空出席，不如將吉位讓俾工作人員進食，唔洗浪費食物之餘佢地又享受到美食，一舉兩得！

市值百幾蚊既瑤柱蛋白炒頹飯，恕大家無福消受啦！

文章刊於作者HR熊 - 職場航行日誌 Facebook及個人網頁，TOPick 獲授權轉載。