電話騙案之「您好，我們是XX快遞…」

本故事純屬二次創作如有雷同實屬不幸

前排最熱門嘅話題莫過於電話騙案，基本上人人都收過自稱順豐速運嘅電話，話有未簽收快件，要你提供個人資料。

騙徒仲似乎迷上角色扮演遊戲，扮完順豐扮中國郵政、中聯辦、公安等等，扮極唔厭（唔做演員真係嘥晒）。琴日，薯仔家族成員──薯餅又喺辦公時間收到騙徒電話：

您好，我們是順豐快遞……

薯餅即刻腎上腺素飆升，咁啱無嘢做，老細又放假，仲唔畀我玩到你？

係呀，我有快遞呀！

騙徒即時上釣（但語氣仍然保持平靜，竭力掩飾興奮之情，專業態度可見一斑），同薯餅展開對話，薯餅瘋狂忍笑之際，騙徒話查到薯餅有一封重要公文寄送時出現問題。

薯餅即刻用好普通嘅普通話答，

無奶油呀，禾嗰時在澳洲潛水呀。

對方死心不息（果然敬業樂業），繼續問薯餅攞個人資料，薯餅話佢只有澳洲身份證，問騙徒要唔要，仲問個騙徒係咪條鯊魚寄失咗。

騙徒終於發現自己被玩，爆出一個非常不文明嘅單字，繼而火爆Cut線。

薯餅講完，我地一眾薯仔家族成員就笑佢唔識玩。話說，早幾年好多財務公司打嚟問使唔使借錢，日日收到嗰下真係會躁底，於是另一薯仔家族成員──薯蓉決定還擊：

騙徒：你好，我地係X X兄弟。先生有無卡數未清？

薯蓉：有呀，有$1億。

騙徒：我地可以提供番個私人貸款……

薯蓉：（打斷）我要借$1億。

騙徒：私人貸款借唔到$1億喎先生。

薯蓉：（躁底）搞錯呀，又話係兄弟$1億都借唔到！

騙徒：我地最高貸款額有……

薯蓉：冥通做到你做唔到，點做生意啊？

騙徒：邊間話？

薯蓉：冥通呀！

騙徒：……我地可以借到$30萬嘅。

薯蓉：借完係咪唔使還？

騙徒：…….

薯蓉：一場兄弟$30萬咁少就無計啦。

騙徒：（默默收線）

事實證明，騙徒除咗手法層出不窮，仲會與時並進、持之以恆，可謂敬業樂業專業嘅典範，呢種精神實在值得廣大打工仔學習。但小生都要提醒大家，千祈唔好信啲來歷不明嘅電話啊！

全文刊於 CTgoodjobs

更多職場、筍工行情，即上CTgoodjobs