莊偉忠：人往低處走
發布時間： 2016/01/04 13:59
2015，誠品財經商業類銷量第一，TOPick最受歡迎文章第一，廣告狂人品牌Facebook專頁、公關「神回應」共享第一，老婆大人讚我第一。
第一，重唔重要？重要，但如果識得尊重自己，第一同第九，一樣咁重要。
畀人肯定，重唔重要？重要，但永遠唔及得自己滿意或者親友肯定咁重要。
開心，重唔重要？重要，話唔重要，除咗扮嘢矯揉造作，我好懷疑唔係人。
做咗啲新嘢，有人肯定，自己又滿意，自high一陣，自信心膨脹一陣，人之常情，但記得自己講過：
旅行嘅嘢，無論幾震撼，記得一日，記得兩日，記唔到三日。
撞板時又講過：
瀨嘢嘅嘢，無論幾大鑊，記得一日 ，記得兩日，記唔到三日。
寫書、寫面書、事業一樣應該咁講：
虛榮嘅嘢，無論幾風光，記得一日，記得兩日，記唔到三日。
最多三日，最好乜都唔記得。
凡事適可而止，自己知就得。時時提醒自已，做人唔使太充實，充實得滯，好容易自我迷失，以為成功全靠自己努力，忘記咗大勢所趨，啱啱遇著剛剛，時勢做英雄。唔使開口埋口話自己點勁，點威，點買樓，點發達。上咗位，就算唔讓人三分，都唔應該睇唔起條件、財富、事業差過自己嘅後生仔。
一個人嘅表面成功，除咗自己，好快無人記得，淨係記得令人反胃嘅拙劣品味同埋淺窄胸襟。
一個人嘅真正成功，助人成功，除咗自己，好多人會記得令人欽佩嘅謙虛品德同埋廣濶胸襟。
2016，乜都唔使第一，我人往低處走，肯定唔使咁充實，快樂就得，老婆大人讚賞就得。
原文刊於莊偉忠facebook，獲授權轉載。
撰文 : 莊偉忠 一田行政總裁
