懷念一串魚蛋就可以滿足嘅年代

「媽媽～我想食魚蛋！」

「吓？就嚟夜晚喇仲食…好啦好啦，無下次呀。」

回想起嗰段無憂歲月，能夠喺媽媽手上接過四五蚊去買串魚蛋。對自己嚟講已經係一次值得自豪嘅艱鉅挑戰，足以開心半日。

五歲嘅自己，就係咁容易滿足。

「喂，不如買串魚蛋食囉？」

「好呀，一串兩個人分就得啦。」

十五歲嗰年，妳身邊多咗一個男仔。放學牽住手經過一間小食店，佢為咗哄妳開心用為數不多嘅零用錢買咗串魚蛋。親切嘅老闆娘仲特意為你地拮多兩粒。

就係咁，企喺小店旁邊妳一粒佢一粒，食到最後嘅時候你地兩個都停晒口，就係為咗將最後一粒留俾對方。你推我讓，最後大家都笑住放棄，乾脆一人半啖食咗佢。

一串咖哩魚蛋可以食得出甜絲絲嘅感覺。妳滿足之餘，仲明白到何謂最純粹嘅幸福。

「嘩？十二蚊一串魚蛋？唔好去搶！」

「係囉，過去排GODIVA雪糕仲好啦！今日買一送一呀！」

「吓？」

即使睇住魚蛋價格幾年間不停上漲，對二十五歲嘅你嚟講實際都只係小數目。想食嘅時候點瘋狂食都可以，無奈嗰種情懷一早都已經唔再喺到。當年嗰間小食店捱唔過貴租執咗了，你再見唔到老闆娘，食唔返熟悉嘅秘制咖哩魚蛋。

你身邊嗰位亦都再唔係十年前嗰個女仔，或者而家呢個能夠同你捱得起老麥，食得起魚蛋。但你心裡面好清楚，自己再點努力其實都係為咗能夠畀到幸福佢。

只係，始終都唔會再係當年嗰種純粹嘅幸福，而係經過現實洗禮嗰一種。

所以，廉價嘅魚蛋仲配襯得起呢種幸福嗎？你不禁咁樣問自己。

「媽媽、媽媽…老師話魚蛋同魚旦都係錯，應該寫做魚丸子呀！」

「魚丸子…？」

三十五歲已為人母嘅妳，拖住五歲兒子準備買魚蛋嘅時候。竟然從佢口中得悉呢個令人非常錯愕嘅課堂內容。就好似三十幾年嘅價值觀，正喺一瞬間瓦解一樣。而事實上妳好清楚，瓦解緊嘅事情並唔指係呢一樣…

妳開始懷念過去。一個單純，好易滿足，又無咁多煩惱嘅年代。

到底錯喺邊到？

「仔…」最後，妳得出呢個結論，「魚蛋就係魚蛋，呢樣嘢係無辦法改變。」

別讓「懷念」變成「哀悼」。
 

魚蛋喺我心裡面永遠都唔會係魚丸子，永遠。

原文刊於作者有心 無默facebook，獲授權轉載。