莊偉忠：不成功便成仁

一年之計在於春，一日之計在於晨，有遠見嘅人成日都咁講，可惜我由細到大本質上只係廢青一個，唔鍾意計劃將來，無乜興趣登高遠望，習慣見步行步，隨機應變，將五尺範圍內嘅事做到最好，所以春天、清晨都唔啱我，呢種性格從來無變過，亦無諗過改。

偏偏人在江湖，收咗人錢，職責所在，無得蛇王呑泡，無論平日點懶惰，點樣放權交託，每年嘅升職、加薪、年終獎金、業務預算四大任務，通通要自己赤膊上陣，趕喺一月中前起貨，然後鼓其餘勇，身先士卒，永遠將戰友嘅利益放喺第一位，向上據理力爭，力陳利害，預咗行先死先，打死罷就，不成功便成仁。

但係要記住，無論講得幾漂亮，抑或左閃右避，乜都唔敢講，醜婦終須見家翁，大事臨頭，市道低迷，試一試就好清楚，只要畀人發覺原來無膽量，順口開河大隻講，千方百計卸膊，淨係識轉述上頭無理指令，借勢剝削，唔將同事利益放喺心上，毫無道義承擔，從今以後唔使旨意有人肯同你搏。

過去八年，人哋點諗，唔清楚，自己覺得問心無愧囉，舊年咁講過：「我盡咗力㗎啦，雖然未至於心力交瘁，但真係攰到趴街，係時候返屋企攬吓老婆，再整啖脷搭脷French Kiss囉。」

今年又要講多趟，信念原則一模一樣，唯一嘅分別係，自己老咗，殘咗，體力差咗，對眼矇咗，對上三日夾埋瞓唔夠十粒鐘，𠵱家打茄輪都無力，好想好想抖抖，長抖好過短抖，短抖好過無得抖，無得抖遲早提前早抖，咁樣做人好無奈，唔使預我。

我鍾意創作，唔鍾意忙，亦唔鍾意同事咁忙，忙得滯又點識創作，無能無良無賴上司至鍾意手下喪忙，但係食得鹹魚抵得渴，𠵱家交咗功課，耐心等候發落，不成功便成仁，我發誓，因為我有勇氣、道德同埋膽量。

全文刊於莊偉忠facebook，文章獲授權轉載。