假如李國章是我「父皇」......

「沙皇」李國章登基成為港大校委會主席後，隨即引來學生罷課集會希望他下台，看來「沙皇」嘅影響力都頗大！

阿潮不禁幻想一下，如果阿潮父親是「沙皇」，那阿潮豈不是「皇子」？不用搞社運都可以在女友面前逞威風啦！

不過對着如此父皇，相信當了皇子也有很多難處，所以你要有以下法寶：

1. 繙譯機

作為「沙皇」，精通多國語言就一定啦，但要知道，偉大高貴的沙皇經常中英夾雜：

Do they want a 黨委書記 at Hong Kong U？

你明唔明乜意思？阿潮後來都係睇咗媒體嘅譯法才如夢初醒。

身為劍橋大學醫學博士的「沙皇」怎會不知道「黨委書記」英文是Party Secretary — 這兩隻連小學生也知道的英文字？他只是不想神聖的「黨委書記」一職被洋文讀出而已！

在場的港大校長馬斐森聽不懂？Who cares？不過要聽得懂沙皇聖旨，相信也要準備繙譯機。

2. 開放大門

正所謂家醜不傳，平民百姓家中若有爭拗，通常都係關埋門坐低，一家人坐低三口六面講真講楚。

講到明是「沙皇」，豈能同平民百姓同個做法，你咪使旨意關埋房門同他好聲好氣商量，隨時被賜個文革式禁錮嘅罪名，死無葬身之地。

想像下，當你左手關上房門，「沙皇」已經高呼奴才來護駕：

你做乜文革式禁錮我？哎啊，虐老啊，人來啊，我被人禁錮虐待啊！I’ll remember this. You will pay！

不好意思，即使你沒有要他文革式「跪玻璃」或「放飛機」，在沙皇眼中，你有罷過課，你都是紅衛兵。

3. 一心二用神功

身為沙皇之子，一定要學會父皇的「一心二用神功」。03年李國章做教統局局長時，曾經在立法會一邊打機一邊開會，還要說局長任何時候都可以一心二用。

所以作為「分心」的第一高手，父皇最近「一心二用」去了別處，迎接新一春（好似係）。阿仔，學嘢啦！

4. 耍太極

面對「權在我手」的沙皇，當他兒子總不能是廢青。雖然可以學父皇一樣「成功靠父幹」，但若被高壓統治怎麼辦？不要緊，可以學父皇過往的太極名言：

研究校園欺凌問題？

無意思！唔需要做呢啲研究！

簡直唯我獨尊，無法辯駁，還是耍耍太極算了！

5. 回收筒

沒錯，你家中會收到一大堆《文匯報》，誰叫沙皇在校委會上說自己不看《文匯報》，結果《文匯報》說要贈閱一年，弄得自己日日收到《文匯報》。

無論高貴的父皇看不看中文報紙，看完的報紙總要回收吧！

阿潮最後也要弱弱地「戴頭盔」說一句，以上純屬FF，跟任何人（包括李國章兒子）無關。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。