莊偉忠：吩咐腦細

收到同事電郵，單刀直入要我下星期接受雜誌訪問，唔係問我有無興趣、想唔想做訪問，口吻語氣唔同平日，直頭吩咐我咁。

睇清楚上文下理，啊！原來係咁嘅原因，拍檔即係拍檔，知道理由充份，根本唔使事先問，就算佢自把自為接錯job，或者我無興趣接受訪問，都肯定照吩咐做，明知無得呀吱呀咗，唔使多諗，即覆下星期五日都得。

實務上，同事係專家，係真正幕後上司，腦細不過台前手下，責任係配合同事吩咐，做有利公司嘅事。

想業務成功，一定要各司其職，分工合作，十足授權，唔係得棚牙，唔係紙上談兵，係要喺現實中摸索分權分責分工，靠大小戰役，培養感情互信，慢慢建立無堅不摧嘅默契同埋團隊精神，關鍵係胸襟，實效先行，放低個人英雄感，在乎件事成唔成功，而唔在乎邊個居功。

唔好再嘥時間羨慕人，唔好嘥時間咒罵腦細，多數腦細講金唔講心，講權力唔講能力，胸襟唔使慌，膽量唔使恨，無論點羨慕，點咒罵，都改變唔到現實。

現實選擇有限，一係跪地戲豬乸，逆來順受，怨天尤人，一係良禽擇木而棲，一係用反智腦細做反面教材，佢做嘅你唔做，佢唔做嘅你做，佢唔似人你做番個人，靜雞雞運用無講明嘅「剩餘權力」，喺五尺控制範圍內，用胸襟膽色，累積信譽信心，鬥長命，鬥毅力，搵機會突圍而出，總好過坐以待斃，無力感日日增加。

如果唔敢吩咐腦細，唔敢做錯決定，不如畀啲啲胸襟雅量，聽手下吩咐，群策群力，實效先行，成功仲有少少可能。我班同事乜都敢，如果唔敢，點敢吩咐腦細，點敢做真正話事嘅負責人。

2016過咗成個月啦，希望大家坐言起行，膽大啲啦，唔怕輸，至有機會做贏家，就算輸，都叫做盡過力玩過啦。

原文刊於莊偉忠facebook。文章獲授權轉載。