打工仔被劈炮5個先兆

職場 11:55 2016/02/12

分享:

相片來源:CTgoodjobs

農曆新年後又到轉工潮,但究竟打工仔係自己劈炮定被劈炮?未到最後一刻都話唔埋。唔想懵盛盛收到大信封先晴天霹靂?留意以下先兆,中咗嘅就醒醒定定搵定後路喇!

1. 生人勿近

如果同事們本來吹水吹到手舞足蹈,你一行埋去就收晒聲,刻意避免同你有眼神接觸,開會、發重要電郵時唔預你,就係一個非常明顯嘅警號。辦公室從來無秘密,佢地一定收到關於你嘅風,仲要一定係衰野,先會避開你。係咩衰野?諗都諗到啦!

2. 老細同你關係惡化

老細同你面對面相處嘅時間比以前大為減少,相對用多咗電郵或短訊溝通,佢會喺會議上打斷你發言,否定你見解,詢問每個人意見但完全唔問你點睇等等,種種跡象都顯示佢唔妥你。唔妥你,自然KO你。

3. 派人插手你工作

老細突然搵人做你副手,或者將原本屬於你嘅工作安排畀其他同事負責,千祈唔好傻豬豬上身,以為佢良心發現想減輕你負擔,佢根本就想飛起你!

須知道,老細無可能喺毫無準備之下炒你,搞到啲野無人跟。佢會確保副手完全掌握你日常業務,可以代替你,當副手學成之日就係你離職之時!

4. 一朝天子一朝臣

一直好睇你嘅老細離職,新上司似乎對你不聞不問,咁你就要小心。通常新上司都唔鍾意前朝老細嘅親信,如果新阿頭曾經係隔離部門嘅同事,以前工作上難免有過牙齒印,或會懷恨在心。況且新官上任三把火,佢要確立地位、鞏固勢力,必然會喺公司安插自己人。綜合以上各點,你實至名歸成為開刀首選。

5. 你被分配不可能的任務

畀老細指派負責難度極高近乎不可能嘅項目,你或者會以為佢睇得起你,然後沾沾自喜。而小生只能說:少年,你太年輕。

呢個係自古以來老細炒人最高明嘅方法。佢一早想炒你,奈何你表現中規中矩,無咩大失誤,搵唔到炒你嘅理由,於是就畀件豬頭骨你,等你失敗嘅時候,就大條道理話你工作能力差、表現不達標bla bla bla。當然啦,如果你咁好彩成功咗,功都係佢領,咪狂讚自己知人善任囉咩呀。

全文刊於 CTgoodjobs

更多職場、筍工行情,即上CTgoodjobs