情人節的阿仙奴災難

情人節黃金時間，即八點到十點燭光晚餐時間，剛好撞正阿仙奴對李斯特城，英超榜首對第二名。身為阿仙奴擁躉又豈能錯過，好彩有手提電話睇直播，一路睇波一路食，以為好完美，點知變情人節災難。

坐低擺低部機，好緊張呀，「華弟」入波，阿仙奴落後一比零。

阿仙奴十多年無拎過冠軍，雲加畀人笑到面黃，今年最有機會再做英超冠軍；歐聯唔使諗了，下一場對正巴塞，出線機會真係微乎其微。

「Baby，我今日著得靚唔靚？我哋一齊影張相，我要放上facebook。」

「好好，等多陣」，嘩，李斯特城的森遜被罰紅牌，打少一個呀。

女朋友即時面黑，「你睇波得啦，唔使理我啦，咁你返屋企睇到夠。」

女朋友跟手收埋我部機，我望望隔離枱，女的一樣面黑黑，男的以無奈眼神與我對望。在個一剎那，兩個不認識的男人，在一間餐廳內，心靈是如此靠近。

我好想同女朋友講，你明唔明，我自中學時代睇阿仙奴，那是柏金年代，已經深深愛上呢隊波，比同你一齊早得多。你唔明唔，愛一隊球隊是一生一世，而女朋友是可以換的；你明唔明，阿仙奴十幾年無拎英超冠軍，而情人節年年有。

當然，這番話我不能說出口，我明白，以我呢種無車無樓的「廢青」，有女朋友陪過情人節已經是上天的恩賜。

怨只能怨英超賽會，為何阿仙奴對李斯特城要安排在情人節舉行，班英國佬是不是腦筋有問題，搞出一場「阿仙奴災難」。

返屋企睇賽果，阿仙奴最後一刻絕殺李斯特城！可惜，我錯過了振臂歡呼那一刻。搵女友，一定要搵個識睇波的，一定要！