藍橘子：食譚仔悟出一蚊致富的真諦

尋晚去食譚仔，夜晚多人要搭枱是常識吧。

咁啱隔離坐住兩個香港救星，地下放滿LV紙袋。

佢哋兩個研究咗張餐牌好耐，我以為係諗緊應該叫酸辣定麻辣定糊辣定三哥酸……

點知最後佢哋叫咗一碗過橋米線清湯些牙兩份食。
喺呢個時候其中一個就開口講：

清湯少一塊，要辣在這裡加！

佢指住枱面罇辣油。

真係一言驚醒洛克人！原來有呢種玩法！

我一直都以為罇辣油同豉油係裝飾品黎，估唔到原來係減一蚊神器！

喺我驚魂未定之際，大大碗米線就黎到。

其中一個望一望我碗三哥酸，然後起勢咁加辣油，務求令到碗清湯同我一樣顏色為止。

看～都一樣嘛～

說畢佢兩個就好開心咁些牙碗米線黎食。

我當下真係佩服得五體投地，自愧不如， 

難怪我一直都咁窮，原來自己做咗咁多年井底蛙，又有錢又有頭腦羨慕死人……

以前人哋講我都唔信。

原來當一個人活喺圍牆入面，

真係會以為外面嘅世界係一模一樣。

上咗咁寶貴一課，呢碗米線我食得好有價值。

全文刊於藍橘子 x 萬用上帝的facebook，獲授權轉載。標題經TOPick 編輯修改，原題為「食譚仔悟出真諦，難怪我一直咁窮」。