張晨:老屎忽的心理學

職場 12:52 2016/02/25

分享:

相片來源:iStock

老屎忽嘅思想世界係一門好複雜嘅心理學。極度自戀又極度封閉。如果你同佢講「神創造了世界」,咁佢心入面就會覺得「咦,原來係我創造咗世界……」

佢哋有種Mind Set好恐怖,仲癲過啲邪教,就係無論咩嘢事,只要你年紀或者輩份細過佢,嗰樣嘢佢識而你唔識,等於你無用。(潛台詞係我最威威。)但若然嗰樣嘢係你識而佢唔識,就等於「嗰樣嘢」根本冇用,不值一提。(潛台詞係我仲係最威威。)

喺「自High」呢個項目上面,佢哋擁有先天性優勢。所以,搵佢哋講嘢同哭泣聲一樣,都係絕無意義。呢班人有一種「拒絕新事物」嘅最強技能,見到後生仔做新嘢一定踩咗先,最好踩死佢。

點解老屎忽咁固步自封,唔肯試新嘢?

因為佢哋知自己實唔夠啲後生仔做得好,同事忽然重拾自尊唔想衰畀人睇。所以會盡力摧毀啲新嘢,瘋狂打壓,日進讒言。內心不斷唸咒:

希望啲新嘢全部唔Work,希望啲新嘢全部唔Work。

內心一個信念-「進步」係唔好,最好係冇咩做。

緊係啦,Work咗佢哋就冇碇企,正式變成人形垃圾!(雖然本身都已經係)

就算屎忽痕,要試新嘢,都必定要沿用舊有模式硬生生咁砌出嚟。你唔會想像到一班老屎忽成功開到個Facebook Page之後「跳起Yeah」係一件幾恐怖嘅畫面,同用第三隻腳行第三條路嘅傻佬著超人衫打怪物,再自封新思維一樣,都係戇居到接近無與倫比。

你可能會覺得呢種老屎忽似曾相識,因為香港班官,基本上都係呢個姿態。

日日離地、貪威驚死、Facebook有人Follow下就以為好威、覺得「經驗」係無價。瘋狂關埋門圍爐取暖。

幾時都話,寧願養懶鬼,都唔好要隻屎忽鬼。點解?因為懶鬼最多都係唔做;而屎忽鬼就係唔做,仲要唔畀你做。

佢哋心中有一個願望:

希望自己死嗰日,同時世界滅亡。

當然啦,世界係由佢創造架嘛!(喺佢心目中)

原文刊於張晨(鳥不起)facebook,獲作者授權轉載。

撰文 : 張晨