打工仔10大焦慮 你今日loop咗未?

City 12:23 2016/03/03

分享:

打工仔面對的問題天天都多,無論你的職業是上至中層,或者下至基層,以下10個問題,相信你都會loop。

1. 今日會唔會又遲到?

每朝7點醒來,嗱嗱臨刷牙洗面換衫,跟手就要衝出門口,全因自己住在「大西北」,出市區番工至少需要一小時車程。

一路行一路望住隻手錶,心諗:

琴日OT到差唔多成12點至走得,今日唔小心瞓晏咗添!好在只要趕到呢部車,我都應該仲有時間去買個包當早餐,番公司邊做邊咬啫……

豈料咁啱得咁橋,經常出事嘅港鐵今日又壞車(或者係九巴又脫班),唔單止早餐買唔切,仲可能搞到遲到收warning!咁早出門都搞到咁,你只能無奈……

2. 點解咁多小人? 

職場如戰場,每日番到office,就係壓力嘅開始;對住「扮工室」入面個班對住你就笑騎騎,背住你放毒蛇嘅一班牛鬼蛇神,就係你今日戲子生涯的開始。

小人就好似「7仔」咁,無論你去到邊間office,都總有一個在左近。任憑你點樣對住佢咃嘻嘻哈哈,甚至平日盡量少接觸,都難防小人突如其來的暗箭。

望住坐係隔嚟位嘅Mary,明明佢上次已經跣咗鑊蘇州屎你嘆,搞到老細以為個project一鑊泡係你責任,令你已經暗地裏問候晒佢嘅祖宗十八代,仲恨不得去鵝頸橋打小人。點知今日番工對住佢,咪又係要笑住同佢寒暄吹水。心裡慨嘆:

我要做雙面人做到幾時?

3. 老細會唔會唔批假?

壓力驚人的打工仔要抖下,去旅行是常識吧。難得今次幾經辛苦搶到平機票,可以去歐洲嘆番夠本,不過興奮過後又要面對另一難題,老細會唔會唔批假?

屈指一算,自己條team不算多人,好在嚟緊呢期無大project,心諗今次成功機會好高。點知今日上司係你開口請假前,又比咗個project你揹飛!

我都係想放下假啫,比次機會吖老細!

相片來源:電視截圖

4. Lunch食咩好?

只係一個早上,就已經歷盡九九八十一劫,來到Lunch就當然要呼吸一下自由的空氣!但估你唔到嘅係,食邊間餐廳都成為一大難題!

你:食咩好呀?

同事A&B&C:無所謂呀。

你:咁不如今日食附近個間美式餐廳吖,聽朋友講好似幾正咁喎。

同事A:唔好啦咁熱氣!我驚爆瘡呀。

你:咁不如食日本嘢?啲壽司OK喎。

同事B:下,唔好啦,我唔食得生冷嘢……

你:(……)咁食韓國嘢吖,呢間好似幾平幾抵食喎!

同事C:我最憎泡菜國㗎喎,咪搞!

你:(開始燥底,但保持禮貌)……咁即係食咩好呀?你哋有無咩建議?

同事A&B&C:無所謂呀,你決定吖!

你:(@$^#%&$^%&*$%&)

5. 點解要做我職務以外嘅事?

Mary呀,你過一過嚟吖,有件事想你幫手。

心水清的你一定知道,老細通常搵你,唔係因為你能力高幫得手,而係因為又有一份「神聖」的任務要交托比你。

我個女唔識做呢份數學功課呀,你可唔可以幫佢做埋?

黃子華話過,公司出份糧比你,一半係因為你工作,一半係比你受氣。但計我話,做埋工作職務以外嘅事,一定都係人工嘅一部分。一定係,除非唔係。

6. 係咪應該盡快轉工/轉行?

「做到隻積咁嘅樣」,決定行去pantry透下氣,點知聽到隔離部門嘅主管係到吐苦水。

死啦…我收到風公司呢排唔太掂,唔怕靜靜雞話埋你知-老細諗住炒人呀!

 呢句說話,可怕程度同女友同你講佢有咗BB有得揮!無情雞到底會唔會殺到埋身呢?呢一刻雖然仲係未知之數,不過已經要開始為未來盤算。

有人office連廁紙突然都無得供應,開始擔心公司會步亞視後塵;又有人覺得呢行前景唔好,同類公司近幾年相繼壽終正寢,下一間會唔會就係自己個間呢?

望住前路,你只有一片迷惘。

7. 幾時有得加人工?

日忙夜忙,每日耗費青春為公司賣命,換來的只是「有辱無榮」,講升職加薪,永遠對不起不是你。

打工仔日拼夜拼,「勞力是無止境」,只求加嘅人工可以對得住自己嘅努力。但到頭來每年加得個少少,加極都係萬幾二萬,遙望觸不到的樓價,置業夢都仲係天方夜譚。

想加人工?發夢啦,加班就有你份。

8. 今日有無得唔OT?

終於捱到6點,鐘聲響起歸家的信號。不過世事又點會盡如人意?

臨收工前的半小時,打工仔突然頭都大,因為偉大嘅老細突然天降一堆文件要你做。

說好的6點正放工呢?係香港地,OT是常識吧。不過每日工作繁忙,莫講陪下女朋友行街睇戲食拖下手仔,每晚回家陪下媽媽食餐住家飯,都是不可能的事。你只想同老細講一句:

你比我收工,陪下女朋友行街好嗎?

9. 到底人生仲有咩成就?

經過長到好似3年零8個月的抗戰後,終於可以離開戰場,收工打卡。做到「今天只有殘留的軀殼」,放工後仲想約朋友食飯?不如都係早啲番屋企抖下罷啦。

夜歸途上,回望番工以來做過嘅事,能令你無悔驕傲嗎?結果你發現,每日賴少次野已經可謂三生有幸。回想初衷,以往讀U時對未來的憧憬,對理想的熱誠,心中的一團火最終都被金錢同工作燃燒殆盡。

到底人生仲可以有咩成就?唔通咁就一世,一生一世只能為錢幣做奴隸?就算飲多幾啖青島,依然都係望唔透。

10. 點解聽日又要番工?

塵世間最大嘅痛苦,唔係有一段感情你無好好珍惜,而係聽日又要番工。

每個打工仔內心,都有一個卑微嘅願望,就係一覺睡到自然醒過來,聽日唔洗番工!不過,呢啲都只屬FF(即Final Fantasy,最終幻想),各位打工仔,都係回到現實,繼續受難罷啦。

日復日,年復年,以上嘅cycle無限咁loop落去,究竟會loop到幾時呢?