永遠的「寵物小精靈」

曾經，你同我可能有過同一願望，希望有朝一日可以成為一位出色嘅小精靈訓練員。而我哋亦曾以打贏四大天王，繼而上太空捉超夢夢為爆機目標，但後來你發現其實根本冇得上太空，一切只不過係以訛傳訛嘅都市傳說，而你以為全隻game最困難係要打四大天王，但其實一開波揀小火龍、車厘龜定奇異種子做你同伴嗰一刻，先係全Game最困難嘅部份，當然唔可以遺忘專揀剋你屬性嘅MK仔小茂。

《寵物小精靈》，一套曾經令你同我都瘋狂著迷嘅卡通片，甚至可以話係每個90後嘅童年回憶。周邊嘅商品，無論係遊戲卡、實體公仔、定係一餅Gameboy帶，已經可以滿足心靈上嘅需要，尤其係Gameboy帶，能令你落樓下玩識到一大堆「小精靈訓練員」之餘，更填滿了你整個童年。

當年你可能同我都試過用錯必捉精靈球捉垃圾精靈、唔開燈走去行漆黑洞穴、學技禁錯制刪走咗招勁嘢、以為爆機可以上太空、複製小精靈等等，所有回憶都係來自呢一餅Gameboy帶。

由Gameboy走到電腦版、由黑白畫面去到彩色畫面、由最初紅版走到最新嘅太陽．月亮版，呢段日子足足20年，當日試過入場睇《超夢夢反擊戰》、《利基亞爆誕》嘅你同我，都已經擺脫了昔日稚氣，變成了一個為生計而勞碌奔命，連睇戲都未必有時間嘅打工仔，但「純白底」小智表示，佢仍然只得14歲，依然向著佢要成為出色小精靈訓練員目標邁進......

當成個世界唔同晒，但小智依然十年如一日繼續去佢嘅旅程，我哋笑佢永遠得14歲嘅時候，其實每一個又何嘗唔係希望好似小智咁，永遠都長唔大，永遠都可以向住夢想邁進？

雖然今日未必再似以前咁坐定定睇火箭兵團又一次飛出外太空，亦未必知道今集出現嘅小精靈係叫咩名，甚至除咗比卡超之外，你唔知自己仲認得邊一隻小精靈，但每次留意到比卡超嘅消息，總會令你憶起昔日睇《寵物小精靈》、玩紅版、銀版、儲實體公仔、整精靈圖鑑、經常哼住主題曲等等嘅昔日情懷。

而就算《寵物小精靈》個名，被統一成比《口袋怪獸》更柒嘅《精靈寶可夢》，啲小精靈個名同樣被改到九唔搭八都好，對佢嘅情懷仍然不會變，亦唔會因此改口，因為喺我嘅世界裡面，佢，依然係叫《寵物小精靈》。

BTW，點解背背龍就可以叫乘龍，而比比鳥唔可以叫周柏豪？

原文載於Jencfu facebook專頁，文章獲授權轉載。

標題經TOPick 編輯修改，原題為〈寵物小精靈呢個名，喺我眼中永遠都唔會變〉