HR小薯蓉:遞辭職信應留意的4件事
發布時間: 2016/02/29 14:09
▲ 相片來源:HR小薯蓉Facebook
一如所料,過咗年之後我張枱就被海量嘅辭職信淹沒;人地過完年返公司𢭃利市,我就𢭃到好多辭職信。如果話男人專心工作時係最吸引,我肯肯定我呢幾日淨係坐係個位度都已經溝死女。
睇咗辭職信咁多年,發現好多人無論辭幾多次職,都係唔會識寫辭職信,如果你打算辭職,可以留意下以下幾點...
1. 邊日係last day?
近排成日都收到電話打嚟問,「我想辭職,但唔知邊日係last day。」
其實係好簡單嘅數學題,例如你2月5號辭職,要一個月通知,將5減1再加返1個月,即係3月4號就係last day喇!你可能都覺得好簡單,但原來好多人都會亂寫,難為HR嘅哥哥姐姐成日要打去同人confirm。
2. 記得寫埋邊日辭職
有啲人搵蘇師父算過邊日last day係吉日,但又唔知應該邊日辭職先啱。其實跟返上面嘅計算方法就計到,但請記得寫埋你嘅辭職日期係信上面,唔係HR計唔到你有冇俾足通知期㗎。
3. 請簽名吖老細
辭咗職你就重獲自由,自己做返自己老細。不過麻煩你係炒你老細之前睇睇封信簽咗名未,唔係我以為封信係你隔離位幫你寫,「被辭職」都唔知。
4. 唔該霸氣少少
最近短時間內處理大量辭職信,嗰幾封一模一樣嘅辭職信真係好鬼覺眼,佢地只係人名日期唔同,內文每隻字都一樣,唔睇真啲真係差啲當副本碎鬼咗。
我諗應該係google大臣頭幾個建議嘅sample啦......其實辭職都可以型少少嘅,有一封自己寫嘅辭職信,辭都辭得有霸氣啲啦!係先唔係先?
祝辭職順利,搵份好工。今次講完辭職信,下星期講下求職信要留意啲咩。
原文刊於HR小薯蓉Facebook,獲授權轉載。原題為「遞信請留意返」,經TOPick編輯修改。
撰文 : HR小薯蓉