用首期換婚禮

「陳師奶，過咗大禮未呀？」「後日過啦，到時一齊嚟睇！」電梯口撞見陳師奶，阿媽同佢雞啄唔斷，難為我攞住啲餸喺隔籬呆等十分鐘。「唔講住啦，趕住煮飯，拜拜！」

阿媽揮手道別，手上多咗張餅卡。「阿媽你就happy啦！傾兩句又有餅食。」「唔止呀，佢畀我張帖入面仲攝咗兩張。」「嘩，你同佢唔係好熟咋喎，都派三張餅卡畀你？熟嗰啲點算？」

何太有四張。人哋個女嫁得好嘛！佢女婿不知幾闊佬，畀咗成2,000張餅卡岳母派，聽講禮金有十幾萬𠻹呀。

十幾萬？我好驚訝。

近年身邊朋友陸續出嫁，由草根至小康都有，為咗未雨綢繆，我一一八卦過佢哋嘅禮金，價錢介乎兩萬到八萬不等，十幾萬，暫時第一次聽到。

「陳師奶仲話，酒席嗰度女婿畀咗廿圍佢，幾豪呀。」「佢哋婚後住邊？」

聽講搬去半山住，真本事！總之一句，佢個女就有福啦。

阿媽一臉羨慕。人哋話「嫁」呢個字，係給女人一個家嘅意思，計我話，係給女兒一個價就真！

呢晚我喺度諗，我同陳太個女總算由細玩到大，以前成日喺電梯口玩「123紅綠燈」，夾錢落士多買零食，家下佢嫁個有錢人，可擺脫公屋，飛上枝頭變鳳凰，真係好。

兩日後，陳師奶收大禮，成層樓嘅街坊打開鐵閘湊熱鬧。啲禮多到堆滿客廳。當日大家目光落係準新郎身上，打扮普通，一啲唔似富二代，望真仲有啲面善。

後來發現，原來我真係識佢。

鄰居陳師奶嫁女收大禮，我拍咗片將當日盛況播畀我男朋友睇。突然，佢好驚訝咁問：

呢個係新郎哥？

我點頭。

佢咪同我一齊踢波個阿傑囉，你唔認得呀？

我搖頭。我喺男友口中，聽到另一版本的故事。陳師奶話，準女婿畀咗2,000張餅卡佢任派，用十幾萬禮金迎娶囡囡，兼送出廿圍酒席，呢啲都係事實；不過，佢完全講唔上係富二代，阿爸只係公務員。

陳師奶仲話，個女同女婿會搬去半山，但嚴格嚟講，只係新界某斜坡上嘅700呎村屋，仲要同老爺奶奶共住。

我男朋友話，阿傑大大話話向女家進貢近40萬，筆錢佢原先打算做首期，可惜未來岳母喺禮金、酒席所有事寸步不讓。

佢太太都好唔開心，覺得阿媽「賣女」，無考慮過佢哋嘅將來，儲錢大計要由零開始。

據講陳師奶之所以企硬，全因佢個寶貝囝亦到適婚之齡，重男輕女嘅佢希望鑿女婿一筆，然後補貼自己娶新抱，真係識計數。

為咗結婚，無咗筆首期，聽到都想喊三聲。換着我係阿傑，可能私下同老婆註冊，再按原定計劃買樓結婚。男友拍我個頭：

邊得吖？你打算成世都唔見你阿媽呀？

咁又係。不過，我阿爸阿媽咁錫我，又使乜擔心喎。

全文刊於《晴報》

《晴報》facebook