孫立民:職場嬲嬲 人際出事位大起底

職場 11:50 2016/03/09

分享:

相片來源:iStock

fb新加進了嬲嬲表情符號,正好為職場加添導彈胡椒噴霧。職場永遠都是人際戰場,你用支.38窒我,我立支AK47怒啤番你;老闆send email 附件個手榴彈問候成個月開唔到單的sales,個sales 與同事食午飯時即放沙林毒氣狂數老闆卑鄙上位和係東莞有四奶。

為甚麼職場戰火如此猛烈,互相殺戮,血流成河?真的有那麼多勇武暴徒嗎?當然不是,為了一眾職場巴打和絲打的幸福,就來個人際出事位大起底。

人際互動分析Transactional Analysis

讓我們出土一個數十年前分析人際互動的理論,Transactional Analysis (Eric Berne, 1957),封了塵生霉菌都用?係,因為這套分析架生堅實用,且簡單易明,入口即溶,容易消化(明顯遷就你的程度)。

Eric 受佛洛依德影響(你唔知佛洛依德係邊位阿叔?relax,只要你未過三十,唔算太樣衰,維基一下吧),他認為每個人有三種自我狀態(Ego State),分別為父母(P - parent),成人(A - adult) 和兒童(C - child),三種自我狀態可細分為以下五種角色:

1. 批判P (criticizing parent例子:某校委主席《堅尼地大學》版)

特徵:專橫、獨裁、權威、不體諒、堅定、有效、強勢;

2. 呵護P (nurturing parent例子:司棋姐《真情》版)

特徵:照顧、關懷、犧牲、一切為你好、噚氣、主觀、

3. 理性A (rational adult例子:吳啟華《妙手仁心》版)

特徵:理性、客觀、冷靜、冷漠

4. 率性C  (free child例子:杜如風《流行首爾》版)

特徵:活潑、熱情、情緒化、發洩、自我、投射偏見

5. 順服C (adapted child例子:差利《摩登時代》版(知嘅,勁out嘛,但到位囉!))

特徵:順從、取悅、逃避、壓抑、逃避衝突

互動劇場

在不同處境每個人會放出不同的角色出來,例如面對難纏的客人,你可能用順服C,讓衝突軟著陸;處理百厭兒子,要出動批判P才能鎮壓得住;與女友sweet sweet時,自然是由率性C揸fit:「我靚啲定家欣BB靚啲,你話!」

人際間很多時因放錯角色出場而出事(cross transaction),例如處理撻著了的顧客時,如果派批判P出場:

你話碟乾炒牛河難食唔會俾錢,你係唔係想R着數先。

顧客會即時會變了超級撤雅人,使出十級龜波氣功KO你。

又例如與女友共渡情人節之際,沒理由放理性A出來深度分析旺角暴亂成因及胡鬚曾出選機會,就算女友是深黃絲加本土公民熱血前線,都會即時車舊磚過來!

職場人際拆彈

經過上面那麼淺入淺出解釋後,讓我們做點練習。請指出以下對話是以由那一角色說出來及應如何回應?

a) 批判P
b) 呵護P
c) 理性A
d) 率性C
e) 順服C

1. 與你同級的Peter向你說:「我地得番咁少時間,你呢個提議一定唔work囉!」

Peter用那一角色與你對話? (對,批判P,超強,俾個like你先)

咁醒,那麼應用那一角色回答?

出事回應:

如果用批判P回應:「你淨係話唔work,但又攞唔到一個work嘅出嚟!」

(假若真的用啲咁出事嘅回應,相信Peter不是在你的電郵就是在你杯咖啡下毒)

較OK回應:

理性A:「等我試吓再精簡一下,不過最少都需要多兩日先至攪得掂。」

(打完仗,和平啦!和平啦!)

2. 你老闆指住你個太陽穴:「咁樣寫法根本表達唔到個意思,你有冇用腦架!」(仍然是批判P)

出事回應:

如果率性C回應:「你咪以為做老闆大晒,我都有阿媽生,講嘢尊重啲好播!」

(明顯你會很快加入亞視大軍)

較OK回應:

順服C:「sorry sir,我會整理一下個report,盡快再交俾番你。」

(明白你此刻心裡淌血,但你會生存下去,成為生命勇士,加油!)

3. 顧客 :「成粒鐘啦,我碟焗豬幾時得?我白頭髮都出咗三條,請唔夠人唔好學人開鋪!」 (明顯係率性C跑了出來)

出事回應:

俾理性C試吓回應:「先生,家陣lunch時間人多,係耐少少,講開又講,其實你落咗order只不過45分鐘,未夠一個鐘囉。」

(你會係搵到成地下都係粗口同埋餐牌水杯刀叉牙簽筒糖鹽,我敢講)

較OK回應:

不如改為呵護P:「先生對唔住,知道你趕住返工,等我即刻入去廚房同班大佬跟跟,如果漏單,我叫佢地即刻炒碟吉豬過你。」

(嘩,超cool,老闆同個客都會like爆,堅係同儕學習楷模,得戚得你!)

You’re OK, I’m OK mode

人際間open fire你插我雙眼我捅你一刀,往往因為大家放了一個只是自己喜歡、或慣常使用的角色出來,而不是顧及對方的情緒和處境的需要,除非你的目的是想引爆自殺炸彈濫炒。

如果你自認是人際的Mr. Wrong(宅男唔算,被宅男才是),麻煩閣下每次出招回應時,稍遲廿秒,想想對方的角色狀態,他希望得到甚麼角色和情緒的回應?揀啱個最fit的才讓它出門。

暫且disable你的default mode,轉回You’re OK, I’m OK mode,你找不到這個mode?檢查一下你自己究竟係原廠貨定A貨?我這樣率性C挑你機,你會用甚麼角色回應?

各位若遇到職場管理、辦公室政治、人際衝突、或前途抉擇等難題,歡迎留言提出。筆者會詳盡分析和解答,亦可瀏覽盈力僱員服務顧問網頁

撰文 : 孫立民 盈力僱員服務顧問首席顧問