從Selina離婚談抉擇與代價

休閒 16:00 2016/03/09

分享:

相片來源:Selina的官方facebook

「我真係接受唔到囉!」台灣歌手Selina離婚嘅新聞一出,即刻令S.H.E.粉絲們喊到變豬頭。「明明佢哋就係天造地設嘅一對,當Selina畀火燒親、差啲毀容時,阿中都對佢不離不棄,點解會咁?」老友Amy深信二人仲有彎轉。

其實脫下藝人面紗,偶像亦只係尋常不過嘅普通人。

Selina係面書交代,離婚其中一個原因係婚後依舊專注事業,無好好經營呢段婚姻。Denise無意評論二人嘅感情事,只係覺得今時今日嘅局面完全係當時人嘅選擇。以佢哋嘅經濟條件來講(男係律師,女係知名藝人),相信應該無錢銀壓力,Selina揀事業先行,係佢嘅Choice。

唔似得香港地,幾多人為咗層樓,結咗婚仍被迫要公一份婆一份?有時陰謀論諗:莫非高樓價政策係政府嘅詭計?喺人口老化嘅情況下,迫使女性婚後繼續賣身畀公司,維持香港嘅勞動力?

好似我公司位媽媽級前輩,日日都話唔想撈,想返屋企湊囝,可惜佢老公份糧唔多,佢先焗住做。好記得當年佢放完產假,一講到自己首次離開囝囝返工,居然忍唔住大聲爆喊,話好後悔買咗層樓,代價係將個囝雙手奉獻畀奶奶(佢一直唔想兩老湊),真係嚇咗我一驚。

其實都唔可以話佢係『被迫』,呢個亦係佢嘅選擇。

人生有好多時要做抉擇,邊個唔想有樓又有美滿家庭,按自己節奏返工、持家、再做鍾意嘅事?但你做決定之前有無計過數,諗下錢同時間點拆先?無嘅話,結果不如人意,就唔好怪人囉!

全文刊於《晴報》,標題經TOPick 編輯修改,原題為「抉擇與代價」

《晴報》facebook

撰文 : Denise 晴報