鄭丹瑞：治標不治本的委員會

學期未完，香港有二十三個學生，因不同理由輕生；搞出人命，換來教育局局長一句「加油」，似乎有點涼薄。於是為了要表示特區政府是關心學生的，一個宣稱研究了解學生自殺原因的「委員會」，橫空出世。好了，政府終於肯為學生做點事，孩子有救了！我以為。

不過係半年後噃！

好事之徒潑冷水：

求神拜佛呢半年唔好再有學生出事！否則，半年又半年，半年又半年，個委員會就要無了期咁去研究，點解咁多學生頂唔住學習壓力而自殺，但係又永遠無結論。

一眾損友正討論這個委員會到底能有多大的作用？

其實個結論一早已經出咗嚟！

好事之徒繼續其偉論：

罪魁禍首，就係朝令夕改，左搖右擺，求學正是求分數嘅香港教育制度！喺一個教育制度入面，當所有人，包括學校、包括家長，都認同可犧牲體育堂，改為進修班，甚至星期六、日都要返學補習時，點解咁多學生自殺嘅答案，已呼之欲出，佢哋仲有咩值得研究呢？

香港教育制度出了很大問題，人盡皆知，公道點，也不可能完全怪罪在這位教育局局長身上，諒他也沒這樣大的本事。這個委員會必須成立，我只感到成立得太遲，而所探討的，都是些治標不治本的議題，成效存疑；我想知，為甚麼要六個月，而不是立即？你肯定未來半年，就不會再有學生做傻事嗎？

原文刊於經濟日報（收費閱讀），標題經編輯修改，原題為「半年」。