從前「捱麵包」年代已經過去

從前有一句說話叫「捱麵包」，意思即係話窮人沒有能力大魚大肉，要「醫肚」，麵包就是一個較為經濟和飽肚的食物，所以食麵包係要「捱」。

大家知唔知依家在集團式經營的麵包舖，買一個叉燒包要幾多錢？有冇研究過自己食咗啲乜？有冇發覺依家啲麵包越嚟越輕？真係好似一陣風咁，食完都唔係好飽。

差不多每次行動我也會分享「空心叉燒包」的故事，但係講咗咁耐都未正式為叉燒包進行「解剖」程序。

機會來了。

在某連鎖店買咗一個叉燒包，原來一個麵包有102克，到底102克有多少？大約有12個兩蚊大餅咁重。將麵包殻、發燒粒和肉汁分開，終於睇清楚一個價值$8嘅叉燒包，大家可以食到啲乜，原來有十粒「叉燒粒」和「飽殼」，當然還包括美味的肉汁。

大家又知唔知道一個拾荒老人家，在街上要執幾多嘅汽水罐先可以換到一個價值$8的空心叉燒包，食到這十粒「叉燒粒」和「飽殼」，按照市值1毫子兩個計，老人家需要執160個汽水罐。

咁一個老人家要執160個汽水罐需要幾耐時間？按照親身經驗，兩個年壯健的男人用三個鐘頭翻開超過100個垃圾桶，搵到99個汽水罐，再作簡單運算，一個老人家就要用十個鐘頭「就」可以去「享受」一個「空心叉燒包」。

香港真的太美好，從前「捱麵包」年代已經過去。

原文刊於Benson Tsang Facebook，獲授權轉載。標題經TOPick修改，原題為〈捱麵包〉。