張晨:唔需要覆嘅短訊多咗
發布時間: 2016/03/31 11:11
▲ 相片來源:張晨(鳥不起)facebook
讀書時候,大約中四,嗰時短訊就係短訊,冇Whatsapp冇Line冇Telegram。
16歲傻更更,曾經好介意部電話太靜,無時無刻想佢有一下震動。
當時三五知己打麻雀,緊有一個朋友部電話係Keep住震,Msg不斷,多到佢要爆句粗:
啲人真係好X煩。
我望住自己部Nokia,長期安靜,冇咩Msg,心中灰到世界盡頭。
或者好多人都曾經介意,點解咁少Msg、點解咁少人主動搵自己。
因為不斷震動嘅手機、不停按動嘅鍵盤,都係一種自我肯定。
口中說煩,心中讚嘆。
就這樣,過了10年。
無數牌子成為歷史、Nokia亦已江河日下,「短訊」這欄也變成WtsApp。
而家,我再唔擔心「冇短訊」呢個問題。
平日嘅一段路,即使短短5分鐘,Wtsapp都處於「長響狀態」,每分鐘總有新Msg。
感覺已不再寂寞,卻又更加寂寞。
因為你深深感受到,呢啲Msg都係Group Msg。
點都好,Group Msg嘅含金量就係及不上Private Msg。
甚或乎,你並唔了解自己喺某啲Group入面嘅定位。
好似只係一種附屬,覺得你有少少(真係唔多)屬於呢個圈子,咁做下好心地加你入去,面對大部份Group Msg,你覺得自己似一個旁觀者,多過參與者。
行兩步,你望一望,再行兩步,又望多望。
5分鐘之間嘅短訊,你全部望晒,但係一個都唔覆到。
分不清楚係唔想覆,定唔使覆。
諗深一層,係因為你知道「唔需要覆」。
到頭來,一切都係科技帶嚟嘅假象。
令你有個錯覺,自己同好多人仲有聯繫。
其實,你只係望Msg嘅時間多咗,但覆Msg嘅時間依然一樣,冇變過。
因為不斷增加嘅,只係一堆唔需要覆嘅短訊。
不過,假象都有個好處,可以呃住自己先。
反正人生之中,自欺欺人都係一種不可或缺嘅技能。
原文刊於張晨(鳥不起)facebook,獲作者授權轉載。
標題經TOPick修改,原題為「近年短訊多咗。但諗深一層,只係唔需要覆嘅短訊多咗」。
撰文 : 張晨