HR奇遇記之奪命追魂求職email

職場 13:18 2016/03/29

分享:

相片來源: HR小薯蓉Facebook

平時我地收到履歷,如果唔啱洗一般都不會另行通知,無消息就係壞消息,大家明啦......有一次我收到一封好特別嘅求職信,就因為封信太特別,所以一早就被放入資源回收桶,估唔到換嚟奪命追魂電郵...

第一次見到封信已經令我印象深刻,首先引起我注意就係張相。呢張唔係一張普通嘅相,而係一張影住張相嘅相!而且我仲見到放張相嘅木紋枱面上面有兩舊擦膠碎。

再睇落去係一段又一段文字,第一段佢介紹自己...

我叫「陀螺小子」,我像一個高速旋轉的爆旋陀螺......

我諗有睇過一兩集《爆旋陀螺》都知道爆旋陀螺可以轉爆牆撞死人,媲美《比卡超》嘅十萬伏特!咁強破壞力,我諗要搵返小火龍、車喱龜做你同事

再睇學歷背景,由小學到大學讀過嘅科目、參加過「超越時空九型人格愛恨情仇話劇」、校際朗誦比賽、做過閱讀大使等等,全部用一段又一段嘅文字寫出嚟,我粗略估計呢份CV字數應該有二千字以上,直頭好似睇緊名人傳記咁。

份CV最特別的地方係竟然列出咗佢每次去旅遊嘅行程...

2015年1月 香港>北京>河南>香港

2013年2月 香港>北京>黑龍江>吉林>香港

2011年9月 香港>四川>香港

我心諗「關我x事?」最後又係一大段文字作結,話自己不知不覺寫了這麼多字(我知呀!!)

咁特別嘅CV通常都係終結於資源回收桶,然後被遺忘。但過兩日我又收到陀螺小子嘅消息..

電郵標題係:

人事部的哥哥姐姐你好,「陀螺小子」非常著急和真誠地等待你的回覆。

人事部的哥哥姐姐?要咁親切咩?

因為兩天收不到回覆,老爸不停催促搵工,令我內心十分著急,希望可以盡快來上班。

其實無論陀螺老豆點催促,人事部嘅哥哥都係冇打算回覆,於是我再將電郵放入資源回收桶。結果過咗兩日,「陀螺小子」嘅電郵又再驚現收件匣,只係內文變咗「等了四天」,之後每隔兩日就收到一個

等了六天......八天......十天......

我諗大家都估到我唔會約佢嚟見工,但少年我實在太年輕了,緣份天注定,有一天我竟然同陀螺小子來了個華麗邂逅。不出所料,佢真人比份CV更精彩......待續

原文刊於HR小薯蓉Facebook,TOPick獲授權轉載,標題經TOPick 編輯修改,原題為「奇形怪狀CV系列之陀螺小子追魂信」。

撰文 : HR小薯蓉