電視界變天 免費台新丁ViuTV明賣人性

職場 10:36 2016/04/01

分享:

魯庭暉以37歲之齡坐上台長寶座,直言37歲已很老,但認為自己夠新,優勢是「乜都夠膽試」!(陳國峰攝)

免費電視台新丁ViuTV,將於4月6日(下周三)開台,究竟ViuTV咩葫蘆賣咩藥?曾主席和梁國雄議員這一對波蘭密友,發生咩事?為何黃金時間播韓劇,又用「雙宋」做頭炮?Topick請來ViuTV台長魯庭暉(Lofai),一一解答。

1. ViuTV其實有咩睇?
答:主打綜藝及真人騷,4月開台已準備10個,排隊上陣!

G1格鬥會是首批「上市」的真人騷,賣美女之間的明爭暗鬥。(由受訪者提供)

2. 為何主打真人騷?係咪無劇睇?
答:因為人性最過癮!人與人之間的關係,是很有趣的東西。我們有個節目,叫《一大一路》,邀請一個大人與一個細路對談,例如上市公司老闆要用一句說話,向7歲小孩解釋生意內容。

我們其實也會拍劇,只是主次問題。因為覺得

香港免費電視市場,未有一間長期投資、專注做A Grade綜藝及實況娛樂的電視台。其他國家,可以做10季、10年,但香港無!

《太陽的後裔》每播一集,就再刷新收視紀錄。為了造勢,ViuTV將邀請「雙宋」來港宣傳。(網上圖片)


3.《太陽的後裔》在韓國已播到第12集,同屬電盈旗下的Viu App,標榜4個鐘就可以上傳中文字幕版本,ViuTV 4月6日先開始播「雙宋」,想點?
答:我估計,現時只有三分一香港人會透過Viu App,晚晚追看「雙宋」,而ViuTV的賣點是有配音,在電視熒幕播,鍾意睇的人仲會不斷重睇,反而是好事。

其實每件事都有一個適應期,蘋果電腦一出,成件事好Designer(設計師),很多人說太優雅,不適合自己,最後還是變成大眾熱捧的東西。


4. 有冇諗過《跟住矛盾去旅行》會跑出?反應好,係咪會播10季?
答:其實有些好運,我們也想不到長毛會在議事廳提起這個節目,可能佢自己又想起一些甜蜜回憶,我們很難控制。

之前都講過,我們不介意3年換一次口味,如果件事好成功,都唔好攬住唔放!

如果因為昨日好成功,不斷「翻炒」舊蹺,我們只會變成另一個故步自封的電視台,這樣香港不會有新東西,只是左手換右手。

宣傳片一出,網民(尤其是女網民)期待指數爆燈,長毛與曾主席的波蘭之旅,自然成為真人騷頭炮主打。(由受訪者提供)


5. 訂左咩目標?ViuTV加入電視戰圈,想改變什麼?
答:而家最大目標就係4月6日有野睇,有野比大家睇。一定要做的東西是拉闊觀眾群,提供新選擇後,

唔睇電視的人會睇番。另外亦想提高密度,由而家睇30分鐘,到遲下睇一個鐘,一個半鐘,就算同81台(TVB)分,大家都有好處。


6. 預計收視?
答:估收視,就好似考會考前預計自己有10A,於事無補,不如比心機,讀下書。不停幻想,幫唔到你的。


7. 外界稱你為「最年輕台長」,點睇?有冇壓力?
答:有咁嘅事?其實37歲已經老啦,37歲真係好老。我無感覺,無理過,唔會因為年齡就代表件事一定好,或者一定不好。宮崎駿畫左咁多年,都仲畫到好多好東西,勁過好多15歲的漫畫家啦。


8. 同事係咪都係後生仔女?有咩相處之道?
答:唔係,千祁唔好比我呢個假像呃倒!創意不分年齡,共通語言是open-minded(開放思維)。

我的head of production,我咁樣講佢可能會好傷心,但佢生得我出。佢係一個好open-minded的人,好過癮,好正。

魯庭暉認為創意無分年齡,後生仔都可以很「盲塞」,老人家都可以很有諗頭。(陳國峰攝)


9. ViuTV請唔請人?
答:你係咪真心聽?你真心聽,我真心答。數字其實唔重要,講到人才,足球員有11個就夠,當然有多11個後備,係會更加好,但重點係可唔可以找到、提升每一個individual。

如果一個同事來到,同一個人,在ViuTV,可以做到他best job ever can do,那就是win win。

挖角潮,不是為這個行業好,同一個人,同一塊牛扒,來到可以變出新菜色,做到咕嚕肉,才有意思。


10. 香港電視界需要咩人?
答:最近tvb深夜重播《鹿鼎記》,當年劉青雲飾演門卒,多麼青澀。其實我們有責任,應該話,

媒體都有責任,培訓下一個劉青雲,下一個周星馳。


11. 點樣培訓這些新人?
答:比機會、自由同資源佢地。我們有一個員工,叫陳志發,是新晉導演,剛拍完一套叫《點五步》的電影。上兩個星期我路過茶水間,佢同幾個編劇開緊會,佢話:魯生我想問下你呢,咁樣咁樣好唔好。我的反應是:癡線,關我咩事?我來裝水,然後就行走了。其實拍完出來好看就可以了,問我做咩呢?


12. 與同事的相處之道?
答:容許他們講粗口囉,容許他們發洩!其實最重要是令他們不要驚,令他們知道這裡是lead by原則,

不會因為親疏而有多一些、或者少一些資源。

後果是大家都敢講野、夠膽試,亦都不介意錯。

作為電視界新丁,Lofai自信,新也是一種優勢

我新出來,所以我乜野都係新,乜野都夠膽試!

魯庭暉以37歲之齡坐上台長寶座,直言37歲已很老,但認為自己夠新,優勢是「乜都夠膽試」!(陳國峰攝)

撰文 : 洪寶瑩 經濟日報記者