「最年輕台長」ViuTV魯庭暉:乜嘢都敢試!

休閒 17:10 2016/04/01

分享:

電視界今晚將出現「歷史時刻」,亞視熄機、港台接棒,ViuTV免費電視99台亦如箭在弦,準備下周三(4月6日)正式啟播。ViuTV總經理魯庭暉認為「人與人之間的關係,矛盾最好睇」,故該台主打真人騷,誓言要令不看電視的人重開電視。

ViuTV王牌節目《跟住矛盾去旅行》在fb洗版,可說是萬眾期待,被譽為「最年輕台長」、人稱Lofai的魯庭暉,以37歲坐上台長之位,他認為自己勝在夠創新:

乜嘢都敢試!

為強打數個旗艦節目,該台前一晚再臨時抽起兩條真人騷宣傳片,冀更聚焦:首播先主打8點鐘新聞、8點半韓劇《太陽的後裔》、10點鐘《跟住矛盾去旅行》。Lofai稱,自家製真人騷節目是主菜。

開台在即,究竟ViuTV咩葫蘆賣咩藥?TOPick請來ViuTV台長魯庭暉(Lofai),解答十大問題。

1. ViuTV其實有咩睇?

主打綜藝及真人騷,4月開台已準備10個,排隊上陣!

2. 為何主打真人騷?係咪無劇睇?

因為人性最過癮!人與人之間的關係,是很有趣的東西。我們有個節目,叫《一大一路》,邀請一個大人與一個細路對談,例如上市公司老闆要用一句說話,向7歲小孩解釋生意內容。

我們其實也會拍劇,只是主次問題。因為覺得香港免費電視市場,未有一間長期投資、專注做A Grade綜藝及實況娛樂的電視台。其他國家,可以做10季、10年,但香港無!

G1格鬥會是首批「上市」的真人騷,賣美女之間的明爭暗鬥。(由受訪者提供)

3.《太陽的後裔》在韓國已播到第12集,同屬電盈旗下的Viu App,標榜4個鐘就可以上傳中文字幕版本,ViuTV 4月6日先開始播,想點?

我估計,現時只有三分一香港人會透過Viu App,晚晚追看「雙宋」,而ViuTV的賣點是有配音,在電視熒幕播,鍾意睇的人仲會不斷重睇,反而是好事。

其實每件事都有一個適應期,蘋果電腦一出,成件事好Designer(設計師),很多人說太優雅,不適合自己,最後還是變成大眾熱捧的東西。

《太陽的後裔》每播一集,就再刷新收視紀錄。為了造勢,ViuTV將邀請「雙宋」來港宣傳。(網上圖片)

4. 有冇諗過《跟住矛盾去旅行》會跑出?反應好,係咪會播10季?

其實有些好運,我們也想不到長毛會在議事廳提起這個節目,可能佢自己又想起一些甜蜜回憶,我們很難控制。

之前都講過,我們不介意3年換一次口味,如果件事好成功,都唔好攬住唔放!

如果因為昨日好成功,不斷「翻炒」舊蹺,我們只會變成另一個故步自封的電視台,這樣香港不會有新東西,只是左手換右手。

宣傳片一出,網民(尤其是女網民)期待指數爆燈,長毛與曾主席的波蘭之旅,自然成為真人騷頭炮主打。(由受訪者提供)

5. 訂左咩目標?ViuTV加入電視戰圈,想改變什麼?

而家最大目標就係4月6日有野睇,有野比大家睇。一定要做的東西是拉闊觀眾群,提供新選擇後,唔睇電視的人會睇番。另外亦想提高密度,由而家睇30分鐘,到遲下睇一個鐘,一個半鐘,就算同81台(TVB)分,大家都有好處。

6. 預計收視?

估收視,就好似考會考前預計自己有10A,於事無補,不如比心機,讀下書。不停幻想,幫唔到你的。

7. 同事係咪都係後生仔女?有咩相處之道?

唔係,千祈唔好比我呢個假像呃倒!創意不分年齡,共通語言是open-minded(開放思維)。我的head of production,我咁樣講佢可能會好傷心,但佢生得我出。佢係一個好open-minded的人,好過癮,好正。

8. 香港電視界需要咩人?

最近TVB深夜重播《鹿鼎記》,當年劉青雲飾演門卒,多麼青澀。其實我們有責任,應該話,媒體都有責任,培訓下一個劉青雲,下一個周星馳。

9. 點樣培訓這些新人?

比機會、自由同資源佢地。我們有一個員工,叫陳志發,是新晉導演,剛拍完一套叫《點五步》的電影。上兩個星期我路過茶水間,佢同幾個編劇開緊會,佢話:魯生我想問下你呢,咁樣咁樣好唔好。我的反應是:癡線,關我咩事?我來裝水,然後就行走了。其實拍完出來好看就可以了,問我做咩呢?

10. 與同事的相處之道?

容許他們講粗口囉,容許他們發洩!其實最重要是令他們不要驚,令他們知道這裡是lead by原則,不會因為親疏而有多一些、或者少一些資源。後果是大家都敢講野、夠膽試,亦都不介意錯。