給老細的說話

職場 11:05 2016/04/14

分享:

相片來源:iStock

早前寫咗篇「老細最黑人憎嘅說話」,有好多打工仔都有回應自己嘅心聲,但老細們就有啲微言,剛剛個 weekend 朋友嘅 gathering,有位老細級嘅朋友講「都唔知邊條友寫呢篇文,所有同事都 share,話我哋句句說話都係 『有組織冇目的』,試下你做老細呀~」,佢仲 share 咗好多自己嘅苦況,果一刻我當然冇出聲話篇文其實係我寫啦,但我都有安撫下佢,其實我都好明白老細都有自己嘅難處。

其實好多時問題嘅根源,並唔係呢句說話𥚃面,而係老細們應該點去「重新包裝」後再演繹呢句話。明白到有啲難聽嘅說話真係要由老細把口講出嚟,但如果直接講「乜你唔知返工時間係9點咩?」,咁樣邊個聽倒呢句都一定想講粗口,其實將句野換個方式、轉個角度,大家都會開心啲~

佢呢幾日做到好夜,今日唔好計佢遲到!

「Official 返工時間係9點」係人人都知嘅事實,但同事幾點放工,應該唔係個個老細知。真係要責怪啲同事遲到之前,先去HR 問問呢位同事之前幾點放工,其實同事成日OT 夜走,某程度上老細都有少少責任。

唔好以為一個細少嘅 task 其實好簡單,但只要有好多好多個細少嘅 tasks 就足以令我哋OT到夜晚 11 點。

同事因為太忙而間唔中遲到,如果做老細能夠走去同HR講一句「佢呢幾日做到好夜,今日唔好計佢遲到」,老細輕輕呢一句話,相信你會立即變成眾人嘅英雄,一句話換來同事無比嘅信任,我覺得值過你扣佢幾十蚊遲到錢。

大家一條 team,一齊死掂去

工作出錯係人都會有,亦冇人想孭鑊,如果真係「我唔理,你同我死掂佢」,最尾就算解決倒件事,亦冇同事會服你。做得高層,一間公司/一條 team 嘅頭目,就算係邊個同事出錯,都要有孭鑊嘅準備,呢啲高層人工包。

出事果一刻並唔係問責嘅時候,快快脆脆地決解件事先係首要嘅任務,「大家一條 team,一齊死掂去」,呢一句不但盡顯你有大將之風,亦能夠團結同事、係危機時穩定軍心。settle 咗件事之後,再慢慢問責都未遲呀。

為你來年升職做好準備!

公司賺幾多、蝕幾多,基本上同事都會心中有數,呢啲野好難呃,而且打工仔心態係「唔理你賺/蝕幾多,最緊要係我今年加幾多」,OT 咗一年,如果最後只係得到一句「今年冇得加人工」,都真係好 hurt。

大部份打工仔工作目的只有 2 個,「錢」同「開心」,如果唔能夠 fulfill 「錢」嘅需要,老細其實可以諗諗「開心」呢一 part(當然,有啲打工仔會覺得錢就係佢開心嘅泉源),「開心」可以係工作環境、有冇野學、工作機會、AL 等等,換一換個角度,今年雖然係冇人工加,但俾佢哋一啲錢都買唔倒嘅機會,可能仲開心(希望係)。

一位好老細除咗懂得賺大錢之外,就係要懂得體諒同欣賞,作為一個好嘅marketer ,如果能夠將說話包裝一下先出街,從問題中搵出機會,令同事更加 buy 你、服你,咁先會有一個好團隊~

原文轉載自我做marketing fb專頁,獲作者授權轉載。