黃毓民質疑梁振英被掟紙後無反應

立法會議員黃毓民（63歲）於前年在立法會涉向特首梁振英擲玻璃杯案今續審。黃於庭上播放立法會閉路電視片段，片段顯示梁被掟紙及杯的過程，黃質疑梁振英被掟紙後無反應，梁曾反問「我唔知你講嘅反應係咩」，梁稱自己有抬頭望，及後低頭處理文件。

黃再質疑梁被掟杯後感到震驚卻沒有反應，梁重申感到震驚，「英文就咁樣講，freeze咗喺度，萬萬估唔到立法會有人掟玻璃」。黃指梁「無郁，成碌木，死人咁」，並非表現震驚。梁否認及解釋需「定一定神，睇吓有冇受傷」。對於黃質疑梁無反應及沒有作出保護措施是不合情理，梁不同意。

黃亦質疑梁沒有理由擔心會有第2次襲擊，因非建制派議員已全部被趕出會議廳，梁表示如有人要襲擊他「可於1、2秒內衝入來，拎起枱上面物品就掟」，黃笑言「100公呎8秒9都唔得啦」。