吸煙20年　煙民6個月的戒煙實錄

電話響起：「X生，博愛中醫XXX打嚟，想同你跟進下你戒煙既情況。你有無再食過煙呀？」

真心無！
 

咁恭喜你喇！不經不覺，你已經戒咗6個月煙，12月我哋再安排一次覆診啦......

嘩...... 原來已經半年。

自從我成功戒咗煙之後，我身邊食煙既朋友都更堅決地決定要食一世煙。

我細佬，我同事，我同學，我朋友，全部都講過呢句說話：

我食煙係我嘅自由，你可唔可以尊重我，由得我？

但喺我戒煙之前，佢哋係咁講的：

撐你，戒咗佢！
 

我一路都戒緊。
 

係啦，我呢排都有D唔妥，又o徙錢，都想戒咗佢。
 

食少咗架喇，我隨時可以唔食，唔信你問下阿邊個。

WTF。（我真係唔識點用華麗既中文表達WTF果種神髓，我諗嚟諗去都係 搞X錯 / 做乜X嗟 / 係咪玩X我 果D）

點解，點解我連尾燈都見唔到？點解佢地可以變得咁快？

我幻想住佢地D面口，諗咗好耐，終於對呢件事有個小結論。

其實，變的唔係佢哋。變的係我。

我是我，但我的立場不同了。我現在是一個非吸煙者。就算我語調不變，態度不變，我也被判斷為一個「毫不了解為何人家要吸煙」的人。其實我很壞，我從中二就開始吸煙，嘩，差不多20年的煙剷人生。雖然我離隊6個月，但吸煙界的潮流總不會快得讓我堅離地吧？我還是了解你為何會吸煙的，至少比你身邊不吸煙的人更理解。

以返工為例，呢半年來，其實我無刻意迴避過陪人食支煙的請求。我覺得放低工作一陣，落去行個圈、吹兩句水係每日必須的，因為如果唔行開下，會做到水都唔記得飲（真的）。每日如是，繼續有講有笑。直到有一日，我多口講咗一句：「幾時到你哋戒呀？」

一句話，彷彿喚醒了所有在場的人。

你咪玩啦，道德高地呀？你知唔知我幾大壓力？
 

邊X個話要戒，你就話無錢買煙嗟
 

痴綫，從來無講過話要戒，我食少支會死架
 

我食煙係我既自由，你可唔可以尊重我，由得我？

他們從我一個善意的問題裡看到了無窮的敵意。雖然我對他們的答案有點耿耿於懷，雖然我好想講 「你咁健康，食多D都唔怕架」、「做咩呀？你戒唔到呀？」之類的真話，但我沒有我沒有沒有，我深信（互相）尊重是溝通的橋樑。

我是過來人，不是單純又煩又無知的反吸煙人士。

我的確比以前健康了，醫生和宣傳單張都無呃我，至少呢一刻你會相信我是個腦筋靈活的人，對嗎？戒到煙，主要得益的是自己，其次還有身邊的人。其實，戒煙好簡單，只要你找到那個觸發點就可以了。

有些人的觸發點落在喜歡的人不喜歡你吸煙時、

有些人的觸發點落在發覺銀包沒錢時、

有些人的觸發點落在發現咳嗽帶點血時、

有些人的觸發點落在孩子出現哮喘時、

有些人的觸發點落在醫生決定切掉你四份一個肺時、

有些人的觸發點落在不吸煙的伴侶因為肺癌而離開你時。

......

唔寫了。你可以憎我，但我只係講事實。

文章獲Ricky授權轉載。