漏報人壽保險 輸了層公屋

「漏報保險搞到無咗間公屋，真係好唔抵！」排咗公屋4年嘅李太，原本上樓在望，點知房署突擊抽查，發現佢喺申請表上漏報28年前同丈夫買嘅兩份人壽同意外保險，並以虛報資料為由，取消佢嘅公屋申請資格。

當事人覺得一時疏忽搞到無屋住，好不滿，搵議員幫手訴諸傳媒，並打算就事件上訴。

雖然我由細到大住公屋，但亦無留意原來申請公屋嗰陣，除咗入息、儲蓄同股票投資等講清講楚，保險都要申報。房署喺呢件事曝光後亦都重申，無論保險屬咩性質，總之有儲蓄或投資成分，都屬於資產，所以咪話Denise唔提你，如果你都排緊隊上樓，又發現自己都犯咗相同錯誤，奉勸你自動補交資料。

補交資料時自己亦要計數，睇下計埋保單價值，有無超出申請公屋嘅資產上限，以免搞完一大輪先發現自己都唔合資格，白等一餐。

除咗抽查申請人，房署一直有要求住滿公屋10年嘅租戶，每兩年申報全家入息一次。隨住小朋友長大，自然有愈來愈多人工作。以4人家庭為例，入息超過約53,000蚊就要交倍半租，過80,000蚊交雙倍。

有富戶為慳租，就同房署講取消某啲家庭成員嘅戶籍（簡稱「除名」），令全家入息保持低水平，繼續交平租。你覺得算唔算濫用社會資源？

全文刊於《晴報》，標題經TOPick 編輯修改，原題為「漏報保險 輸層公屋」

《晴報》facebook