炎夏行夜山 7大日出靚景
發布時間: 2016/06/03 14:06
最後更新: 2016/08/01 16:54
見到呢幾日嘅太陽,相信大家都唔敢貿貿然「恤髮」(出發)去郊遊遠足。不過,夏天正係行夜山嘅好時節,避開太陽,好好享受山風嘅清涼。行得夜山,就不如睇埋日出啦!較啱時間起程,睇完日出飲早茶,星期日又可以陪屋企人,簡直一石幾鳥!
提醒大家,根據天文台紀錄,六月初嘅日出時間大概係5點半。大家可依照下面路線嘅距離需時,再計番應該要幾點起步嘞。
- 最高:大帽山
大帽山雖云「白果山」,不過始終係全港最高,而且又易去。
登頂方法:荃灣搭$50蚊的士,至大帽山道山腰閘口。再步行45分鐘 (石屎路)
- 最南:鶴咀
鶴咀係港島嘅最南,有座過百年歷史燈塔。日出以燈塔做背景,都咪話唔特別。
路線:凌晨由筲箕灣搭的士至鶴咀路口,步行約半小時到達。
- 最經典:鳯凰山
離香港市區最遠嘅觀日地點,東面完全一望無際。不過山頂霧氣多變,要睇日出要講啲運氣。
登頂方法:
1. 於昂坪營地露營,或在昂坪青年旅舍住宿一宵,凌晨沿山徑而上。需時約3小時。注意係上山有9成係石級,對體力需求極大。
2. 於東涌站搭的士往伯公坳,沿鳳凰徑上山。需時3小時。不過較易行。
- 最浪漫:大頭洲
大頭洲係石澳對出,單係由石澳行橋過去呢件事,已經浪漫死人啦。
路線:搭巴士、的士到石澳,然後由石澳村路行到盡頭,過橋就到。
- 最熱門:大東山
因為有芒草同埋幾間石屋,令大東山成為熱門行山、露營地點。亦因為呢度風景有特色,睇日出都唔錯。
登山方法:東涌搭的士到伯公坳,沿鳳凰徑上山,需時約2小時。
- 最東北:吊燈籠
香港東北最高山,臨近印洲堂。風景極正!就算睇唔到日出,睇印洲堂都好正!
登頂方法:搭的士至烏蚊騰村,由九坦租樹林上山。需時約2小時。(注意:深夜村內或有惡犬)
- 最大平原:昂平 (馬鞍山)
對住西貢海,觀景開揚,又唔使爬高山,天氣涼啲都唔怕。
登山方法:凌晨於馬鞍山搭的士,到馬鞍山郊野公園燒烤場,步行上山接麥徑四段。步行需時約1小時。
注意:部份登山路線極為危險,需要有經驗人士帶領。而行夜山亦要配合適當裝備,例如電筒、食水食物 (因店舖會關門),以及風褸(保暖用)。
原文轉載自Fitz.hk,TOPick獲授權轉載。
撰文 : Fitz.hk