遊韓國 識買一定香港買SIM卡

休閒 14:39 2016/06/28

分享:

去韓國旅遊到底租 WiFi 蛋定買 SIM 卡抵?兩者在香港及韓國都有得租或買,點先最抵用,比較價錢過之外,其實要睇你點樣用,人多 share 就租蛋,不然 Sim 卡最佳。以下是港韓兩地的大比較!

1. 香港租 WiFi 蛋:Crazy Egg 最抵

韓國是港人熱遊國度,各租蛋公司對此都不敢鬆懈,選用 4G 快速 Router 機、割價式減價外,還推出不同優惠吸客,從 Early Bird 超低價至用會員卡折上折都有,總之花臣百出。

好處:由於 1 蛋可最多 share 給 5 部或 10 部智能裝置,愈多人分享愈抵用,加上唔駛在手機做任何設定,一開機即用,至啱機器盲。

壞處:當然係唔黏住部機就冇信號就會自動失聯,而 WiFi 蛋每日只能頂到 4-6 個鐘,要長期上網者要帶定尿袋。

● 如何租最平?

a. 多人同行共用或使用日數長便最抵。

b. 旅遊旺季,愈早 book 機愈好,可享優惠,也可保證有機用。

在香港租 WiFi 蛋,大部分都可以在機場取機,方便仲有優惠。(攝影:劉景茵)

2. 韓國租 WiFi 蛋:Tmifi 稍平

韓國 WiFi 蛋租賃服務,多由電訊公司包辦,可在機場入境大堂分店辦理該服務。費用是數據費、WiFi 蛋租賃費及其按金合計,數據費大致相若,租賃費則視乎你所租的機種略有差異,部分公司在租蛋時,充電器要另付費,優惠也不多。韓國的 WiFi 蛋雖同樣是行 4G,接收力不俗,但大多數只能供 3 台智能裝置,雖然每日可用 8-10 小時,但攤返開人數來 share,始終唔夠香港租蛋抵。

● 點租最平?

a. 出發前要上網預訂,一來可保證到當地有機,另外可以用到免租機優惠。

b. 可透過韓國觀光公社的連結或個別電訊公司網站預訂。

c. 利用韓巢網連結預訂,部分機種不時有優惠,結算以港幣計算,較少出現匯率誤差。

韓國各大機場的入境大堂,都有各大電訊商的 WiFi 租蛋的服務台。(相片Gloria Chan 提供)

3. 香港買 SIM 卡:比韓國少煩惱

要買世界各地電話 SIM 卡,去一趟深水埗鴨寮街冇煩惱。在香港買到的韓國 SIM 卡,多數是 Made in HK,質素不過不失,設定相對韓國 Sim 卡簡單,最重要簡單設定 VPN 已可使用,不用到當地 upload passport 登記,$90-$140 有 2GB 到 5GB 數據讓你用,去 5-7 日旅行煲埋劇睇片都未必用得晒。唯一唔好是大多數卡只能獨自用,未必可以 share 俾同行者,斷綫情況偶然發生。

● 如何買最好?

a. 應就用量需要及日數購買,大多數卡的天數是以接通網絡一刻起計,盡可能到當地先入卡。

b. 在鴨記買的 SIM 卡,有效日期好多時都較短,部分有可能是下個月到期的,購買時要留意。

鴨記 Sim 卡其實選擇不多,部分還會不時冇貨,問清楚先好落手。(攝影:劉景茵)

4. 韓國買 SIM 卡:勝在接收好

跟香港一樣,韓國 SIM 卡,一般都可以在便利店如 OK、GS 25、CU 等買到,方便得很。數據用量大多是 1GB、2GB 數據,部分唔貴鴨記好多,勝在速度穩定,接收好。

記者在趕時間情況下在便利店買下 kt M mobile Prepaid SIM Card,啪咗張卡入去唔係即時用得,原來係要用 WiFi upload 咗你 passport 有相頁到指定網頁註冊,等對方在 9am-8pm 用 SMS 英文回覆後,自己 set 埋 VPN,然後開幾次機先可以正式用到,前後搞咗近 1 個鐘,都幾煩!

●如何買最好?
a. 不同大小的 SIM 卡,價錢會略有差別,購買前最好問清楚店員,或給手機對方看。

b. 便利店店員未必會為你辦理註冊,說明書中有齊多國語言,DIY不難,只係俾啲耐性。

韓國便利店有 data SIM 卡出售,大多數明碼實價寫明俾你知。(攝影:劉景茵)

撰文 : 洪白嵐 TOPick 記者