孫立民:每個打工仔都有陰暗的Default Mode

職場 12:19 2016/06/30

分享:

相片來源:LINE HK facebook

Default mode出廠模式,即是你不動手去改變的話,一定係dd/mm/yyyyy,不會是yyyy/mm/dd,一定用有廠商logo的牆紙、一定係繁體、一定係12小時計。這是生產商認為對用家最理想的設定。

其實每個人都有一套出廠模式,回應周遭世界的挑戰、困難、變化,不需用腦,即時回應,快過i7處理器,仲係永久保用,絕不改變。

唔妥你mode

當你過咗deadline,同事詢問你負責的proposal何時完成,default mode會覺得是被人挑機,你只覺得人地唔知你咁多嘢做有幾辛苦,仲覺得好委屈,唉!

當老闆指出你的report有錯漏,你的條件反射是他老人家奄尖聲悶,用放大鏡找錯處,直頭係針對你。你唔知連銀碼都打錯係有組織嚴重罪行,應該即時送去堆填。

顧客大聲投訴碟飯有頭髮,你第一時間肯定他是玩嘢唔想俾錢R著數。你分析唔到表面證俱對餐廳極之不利,無論個客是真是假,息事寧人必定是首項選擇。

你覺得對方唔妥你,你的default mode 即作出進攻式回應,百分之一秒內反彈個白眼黑面斜啤囉佢,晦晦氣氣喪撳對方發爛渣掣,亦激發了對方的唔妥你mode,拍枱指手怒啤見主管挑機你,你覺得自己的default mode,嗱嗱嗱,冇睇錯人。其實係典型的自我實現。

灰爆mode

有些人的出廠模式是灰爆mode。男友成朝冇whatsapp過你,昨晚一定係有事發生,頓時覺得自己同伍姑娘的遭遇好接近。你對他是毫無保留,他對你口訊都唔留,即係被飛,即係剩女,即係會dry爆一生,天呀!

遲到被老闆見到,個appraisal實花,札職幻滅。公司近來接單少了,公司實摺埋老闆著硬草人工堅追唔到,於是層樓冇錢供老婆會改嫁,隻狗定走佬條金魚都聞炭……!

灰爆mode的回應是,總之任何不幸的事情都是一生一世,無出路無options!

閃射mode

另一種出廠模式是閃射mode。一遇到困難指責,第一個動作是關我鬼事、我意思唔係咁、最衰係個客、個同事低能累街坊、其實係土地不足……。總之我係清白,我唔係兇手,唔好啤住我。

跟著大腳傳中:你應該搵老細個秘書問下,佢最清楚老闆點諗;其實呢單嘢不嬲都唔係我跟開,不如你俾阿George;個同事唔係我管,我唔可以代佢跟進囉;呢啲excel嘢我識條鐵咩,問IT部是常識吧……。

走出default mode,到核心外圍

每個人都有個default mode,特別當你有情緒、感到被挑戰、遇到挫折,必定以default mode 回應,不單快和直接,亦係護舒寶,保護了外間的風風雨雨,把焦慮、沮喪、自卑放到核心外圍。太赤裸面對現實,有時你反應不來。

不過default mode充滿偏見和逃避,當在馬路上見到前面架車好耐都cut唔到線,你的default mode 會告訴你:一定係女人揸;當顧客要求見主管:條友玩嘢牙!

試下prison break,逃離出廠模式,走到自己的核心外圍,看看別人的世界,雖知每個人的笑位、爆位、傷位、忟憎位、發爛渣位皆不同,不能只用自己把呎。

要避免用default mode,可以延遲回應,令情緒降溫。見到同事甩漏會累及自己,出去剷佢笠佢麻包袋之前,用少少時間冷靜下來,想想對方的處境,他經驗不足?不嬲粗心?太忙?佢以為不用這些資料?分析力不足?但他沒有動機要整蠱你。

向自己描述現時的情緒狀態,如果都是激動和負面的,例如想殺人、頂佢唔順、好hurt囉…..等,都不是理想處理事情的時候。深呼吸數次,或離開案發現場,做點其他工作分散注意等都是有效的。

埋位處理,習慣先道理、反老脾。首先澄清事實、給對方十分鐘免於恐懼的自由時間,解釋他的原因和看法,唔好怒啤人、不要倒抽一口涼氣、無需吊高尾音。

Default mode 原本是假設的理想狀態,但當你發覺自己的出廠模式處處踫壁,日日hang 機,未能有效回應四遭的環境和最新變化,係時候要入廠調較一下,難怪Microsoft每晚都出現在我的電腦,強迫我上Windows 10!

各位若遇到職場管理、辦公室政治、人際衝突、或前途抉擇等難題,歡迎留言提出。筆者會詳盡分析和解答,亦可瀏覽盈力僱員服務顧問網頁

撰文 : 孫立民 盈力僱員服務顧問網頁