王維基論選戰:香港人唔好睇小自己

休閒消費 09:59 2016/07/01

分享:

訪問本約在他提出的高級餐廳進行,記者反建議:「落區梗係去茶記啦!」他聽到「落區」顯得份外雀躍一口答應。於是這天,他坐進茶餐廳一角,點了杯凍奶茶,頂着四圍茶客微笑行注目禮和舉機拍照等「另類民情」,細談這個半月來遇到的人和事。

港人與中央關係可協調

他謂這段日子有很多「得意的小發現」,令他參選興致愈來愈濃。

首先,我發現原來好多人諗嘢同我唔同。

他最初以為大眾都認同,梁振英連任的機會很高,但當與不同人攀談時,發覺情況恰恰相反。

很多朋友知道他退了加拿大籍圖參選都問:「Ricky點解犧牲咁大呀?佢都無得做㗎啦!佢做得咁差,中央仲點會俾佢做?」他大吃一驚:

無得做?我覺得佢九成九做梗喎……當時才驚覺大家未好清楚個現實,真係以為佢做得唔好就無得做。唔怪得你哋唔擔心、唔出聲啦!

這段期間,無論左中右、年輕年長、高官專才甚或身處遠方的人,都找他談過。年長的固然說:「唔好搞咁多嘢啦!」意外的是一些年輕有學識的醫生律師也想把他勸退,理據是:「就算你有能力(換特首)你都唔好呀!佢(梁振英)係『團結』香港的重要人物,佢做先會有多些矛盾,激勵多些香港人、阿爸阿媽企出來,無佢就無咗共同目標㗎啦!」

聽到這似是而非的論調,王維基一陣心痛。他意識到很多人都覺得香港已「衰無可衰」,若有一個人可令香港更差,大家寧願「攬炒」,置諸死地而後生。

我唔想咁,亦唔覺得中央同香港人的關係要擘到咁盡,有些事可以協調,這是我的理念。所以這段時間志向沒變,變的是程度,令我更加想換走呢個人。

市民商界認同必須換人

很多市民都認為中央不會讓梁振英連任,但王維基則認為若果市民不反抗,「佢九成九連任」。相片來源:iMoney智富雜誌

盡管大家對「特首做唔好無得留低」各有說法,但令王維基高興的是,他接觸過的大部分人也認同梁振英做得不好,正如他最熟悉的中小企界別,聲音就幾乎一面倒。

呢個時勢你講得唔啱就鬧啦!但這個半月以來我從沒聽過有人鬧我,話:『王維基搞錯呀你!換走我哋咁鍾意嘅特首!我想佢連任喎!』

 

有次在青衣做訪問,幾個阿叔走來都係話:『換咗佢啦,搞到我哋無啖好食!』這就是民意囉!我之前認為這些聲音佔八成,但過咗呢幾十日,我諗係十成。

更感動的是,很多素未謀面的人,包括教會、中學生、大學生及專業人士等,都透過不同渠道聯絡他,予以實質支持。

好多不同背景的市民都主動舉手話幫我,同我講:『如果你選,應該需要呢啲嗰啲,我可以幫你,到時你一定要出聲。』,真係好感動。

所以,是次若出選,背後的支援團隊可能不是甚麼商會協會大機構,而是一班來自五湖四海的星斗市民。

表態換特首比掟磚實際

年初一旺角衝突事件,令王維基感到社會嚴重分裂,由於不想香港再沉淪多4年,所以考慮參選。相片來源:iMoney智富雜誌

他笑言,朋友嫌他政綱只講ABC太膚淺,他沒好氣地回應:

大家無唔同㗎,目標都係爬上山頂,實現一人一票真普選。不過有人只係睇相:『嘩!山頂風景真係靚。』而我就操緊體能、揼緊釘,準備一步一步爬上去。

 

我唔敢講一定得,亦不能透露太多,但我話你知第一步就係要換特首。事實上5月11日之後多咗人醒覺,開啟咗個想像空間,做到㗎喎,唔係無得諗,我覺得這計劃的成功機會比掟磚高好多。

最近很多分析也指,市民對王維基印象不俗,若參選相信能左中右、老中青「通殺」,亦曾有調查指他的民望正在港島區領先。他語帶自豪地說:「除咗做工程師外,我都好熟『孖襟』(Marketing and Communication)。」

他認為現今香港,普羅大眾每天為生活營營役役,未必會積極主動地去認識政治,所以一個有效的大眾傳播方法變得愈發重要。碰巧他的電訊、電視和網購業務令他形象入屋,發牌事件上又經歷過「一男子」的壓迫,造就與港人同一陣綫的感覺,就連他的潛在選舉對手也不諱言,他參選能吸引很多不關心政治的人去投票。而他的宣傳策略則是要簡單地,用三言兩語將重點告知市民,

要搵到佢哋心裏面最痛嗰條刺,挑佢出來,大家就會知道點應對。所以其實我有兩個角色:一個係工程師,一個係關公,哈哈!

信中央按港人意願揀人

對於9月的立會選戰,未想好是否去馬的王維基卻有了頗為肯定的部署,謂無論參選與否,場仗「識打一定係咁打」,就是要將支持梁振英的人拉下馬。

今次選舉是一面照妖鏡,所以一定要迫到候選人講支唔支持梁振英連任。葉劉你講,你想選特首,你係咪覺得梁振英做得唔好先?做得唔好你想坐佢個位,你都仲唔嗌換特首?一定要清晰交代,含糊其詞即係好似周浩鼎嗰啲,我都當佢支持㗎啦。

然而,在一切努力過後,責任始終落在380萬選民身上。他解釋,由於左派鐵票多,故今次選舉必須將以往約52%的投票率推高至60%才有機會溝淡鐵票。「若果仲係得200萬人投票,根本無用。」所以臨別之時,王維基對香港人說了一番語重深長的話。

香港人,你想點你講啦!唔好再賴乜都係阿爺話事,表態完阿爺唔理先鬧啦!雖然制度係小圈子兼盲婚啞嫁,我哋好唔鍾意,但事實上過去3次特首選舉,阿爺都係按香港人意願去揀。

 

第一次董建華民望最高;第二次曾蔭權對梁家傑,百分比是八十幾比十幾。第三次何俊仁14%、唐英年17%,梁振英都是過半數的。若果今次立會選舉反映到民意,北京點會睇唔到?就算佢要夾硬來,70個議員40個都唔鍾意佢,未來5年都唔使玩啦!

 

所以,香港人,唔好太妄自菲薄睇小自己,至少我哋應該為我哋嘅城市努力一次!

(節錄)

全文刊於《iMoney智富雜誌》第453期(收費閲讀)

iMoney智富雜誌facebook

撰文 : iMoney智富雜誌